ന്യൂഡൽഹി: ഭരണഘടനാ പരാമർശത്തിൽ കോൺഗ്രസിനെ കടന്നാക്രമിച്ച് പ്രധാനമന്ത്രി നരേന്ദ്രമോദി. ഭരണഘടനയാണ് കേന്ദ്ര സർക്കാരിന് എല്ലാം, ബാബാ സാഹെബ് അംബേദ്ക്കർ തന്നെ നേരിട്ടെത്തിയാലും അത് പൊളിക്കാനാകില്ലെന്നും അദ്ദേഹം വ്യക്തമാക്കി. രാജസ്ഥാനിലെ ബാർമറിൽ തെരഞ്ഞെടുപ്പ് റാലിയെ അഭിസംബോധന ചെയ്ത് സംസാരിക്കുകയായിരുന്നു പ്രധാനമന്ത്രി.
കോൺഗ്രസ് ദേശവിരുദ്ധ ശക്തികൾക്കൊപ്പമാണ്. രാജ്യത്തെ തകർക്കാൻ ശ്രമിക്കുന്ന ഇൻഡി സഖ്യത്തിന്റെ ലക്ഷ്യങ്ങൾ നടക്കില്ല. ഭരണഘടനയെ തകർത്ത് രാജ്യത്ത് വീണ്ടും അടിയന്തരാവസ്ഥ കൊണ്ടുവരാണ് കോൺഗ്രസ് പാർട്ടി ശ്രമിക്കുന്നതെന്നും അദ്ദേഹം പറഞ്ഞു. കൂടാതെ ഭരണഘടനയുടെ പേര് പറഞ്ഞ് തന്നെ തകർക്കാനുള്ള ശ്രമങ്ങളാണ് കോൺഗ്രസ് നടത്തുന്നതെന്നും അദ്ദേഹം വ്യക്തമാക്കി.
എൻഡിഎ അധികാരത്തിലെത്തിയാൽ രാജ്യത്തെ ഭരണഘടന പൊളിച്ചെഴുതുമെന്ന കോൺഗ്രസ് പ്രചാരണത്തിന്റെ പശ്ചാത്തലത്തിലായിരുന്നു പ്രധാനമന്ത്രിയുടെ മറുപടി. തെരഞ്ഞെടുപ്പ് പ്രഖ്യാപിച്ചപ്പോൾ മുതൽ രാഹുൽ ഉൾപ്പെടെയുളള കോൺഗ്രസ് നേതാക്കളുടെ പതിവ് ആരോപണമായി ഇത് മാറിയിരുന്നു.
