കൊല്ലം: എൻഡിഎ സ്ഥാനാർത്ഥി ജി കൃഷ്ണകുമാറിന്റെ പ്രചാരണ പരിപാടിയിൽ പങ്കെടുത്ത് കുടുംബം. പ്രചാരണ പരിപാടികളിൽ പങ്കെടുക്കാൻ സാധിച്ചതിൽ അതിയായ സന്തോഷമുണ്ടെന്ന് കൃഷ്ണകുമാറിന്റെ മകളും നടിയുമായ അഹാന പറഞ്ഞു. കൊല്ലത്ത് നടന്ന വാർത്താ സമ്മേളനത്തിൽ പ്രതികരിക്കുകയായിരുന്നു കൃഷ്ണകുമാറിന്റെ കുടുംബം.
” എൻഡിഎയുടെ സ്ഥാനാർത്ഥിയായി അച്ഛനെ തെരഞ്ഞെടുത്തതിൽ സന്തോഷമുണ്ട്. അദ്ദേഹത്തിനായി നടിയെന്ന നിലയിലല്ല വോട്ട് ചോദിക്കുന്നത്. മകൾ എന്ന നിലയിലാണ് ഞാൻ അദ്ദേഹത്തെ പിന്തുണയ്‌ക്കുന്നത്”- അഹാന പറഞ്ഞു.
തിരുവനന്തപുരം സ്വദേശിയാണെങ്കിലും കൊല്ലത്ത് പിതാവിന് മികച്ച പ്രവർത്തനങ്ങൾ കാഴ്ചവയ്‌ക്കാൻ സാധിക്കും. നഗരത്തിലെ ജനങ്ങൾ നൽകുന്ന പിന്തുണ കാണുമ്പോൾ വളരെയധികം സന്തോഷമുണ്ടെന്നും അഹാന പറഞ്ഞു. കൊല്ലത്തെ അമ്മമാരും സഹോദരിമാരും മികച്ച പിന്തുണയാണ് നൽകുന്നതെന്നും കൃഷ്ണകുമാറിന്റെ ഭാര്യ കൂട്ടിച്ചേർത്തു.
ജി കൃഷ്ണകുമാറിനെതിരെ സമൂഹമാദ്ധ്യമങ്ങൾ വഴി കുപ്രചാരണങ്ങൾ നടത്തുന്നവർക്കെതിരെയും കുടുംബം പ്രതികരിച്ചു. അച്ഛനെതിരെ കുപ്രചാരണങ്ങൾ നടത്തുന്നത് സ്‌ക്രീനിന് പിന്നിൽ ഒളിഞ്ഞു നിൽക്കുന്നവരാണ്. സ്വന്തം ഐഡിയിൽ വന്ന് മോശം വാക്കുകൾ പ്രയോഗിക്കാൻ അവർ ധൈര്യപ്പെടുന്നില്ല. അത്തരക്കാർക്ക് ഒരു സമൂഹമാദ്ധ്യമത്തിന്റെ പിന്തുണ എപ്പോഴും ആവശ്യമാണെന്നും കുപ്രചാരണങ്ങളെ ഭയപ്പെടുന്നവരല്ല തങ്ങളെന്നും അഹാന വ്യക്തമാക്കി.
