ദുബായ് : മഴക്കെടുതിക്ക് ശേഷം ദുബായ് അന്താരാഷ്ട്ര വിമാനത്താവളത്തിന്റെ പ്രവർത്തനങ്ങൾ സാധാരണ നിലയിലായി.
തിങ്കളാഴ്ച മുതൽ ദിനംപ്രതിയുള്ള 1400 വിമാനങ്ങളുടെയും സർവീസ് പുനരാരംഭിച്ചതായി ദുബായ് എയർപോർട്ട് സിഐഒ പോൾ ഗ്രിഫിത്ത്സ് പറഞ്ഞു.
നിലവിൽ സാധാരണ ഫ്ലൈറ്റ് ഷെഡ്യൂളിലാണ് വിമാനത്താവളത്തിന്റെ പ്രവർത്തനം. എന്നാൽ അനാവശ്യ തിരക്ക് ഒഴിവാക്കാൻ യാത്രക്കാരോട് വിമാനം പുറപ്പെടുന്നതിന് മൂന്ന് മണിക്കൂർ മുൻപ് മാത്രം എത്തിയാൽ മതിയെന്ന് അധികൃതർ നിർദേശിച്ചിട്ടുണ്ട്.
75 വർഷത്തിനിടെ ഉണ്ടായ ശക്തമായ പേമാരി വിമാനത്താവളത്തിന്റെ പ്രവർത്തനങ്ങളെ സാരമായി ബാധിച്ചിരുന്നു. കാലവസ്ഥ മോശമായതിനെ തുടർന്ന് ദുബായ് വിമാനത്താവളത്തിൽ നിന്നും 2,155 സർവീസുകളാണ് റദ്ദാക്കേണ്ടി വന്നത്. കൂടാതെ 115 എണ്ണം വഴി തിരിച്ച് വിടുകയും ചെയ്തു.
നിലവിൽ വിമാനത്താവളത്തിലും പരിസരത്തുമുള്ള റോഡുകളിൽ നിന്നും വെള്ളക്കെട്ട് പൂർണ്ണമായും ഒഴിവായതിൽ ഗതാഗതം സുഗമമാണ്. വിമാനത്താവളത്തിൽ കെട്ടികിടക്കുന്ന ബാഗേജുകൾ ഉടമസ്ഥരിലെത്തിക്കാൻ പ്രത്യേക കർമസേനയെ നിയോഗിച്ചിട്ടുണ്ട്. മുപ്പതിനായിരം ബാഗേജുകളാണ് കെട്ടികിടക്കുന്നത്.
