അല്വാർ : വീരമൃത്യു വരിച്ച സൈനികന്റെ മകളുടെ കന്യാദാനം നിർവഹിച്ച് സിആർപിഎഫ് ഉദ്യോഗസ്ഥരും സൈനികരും . സൈനികനായിരുന്ന രാകേഷ് മീണയുടെ മൂത്ത മകൾ സരികയുടെ വിവാഹം ഏപ്രിൽ 23 ന് രാജ്ഗഡ് സബ്ഡിവിഷൻ ഏരിയയിലെ ദുബ്ബി ഗ്രാമത്തിലാണ് നടന്നത് . 2010ലാണ് രാകേഷ് മീണ വീരമൃത്യു വരിച്ചത് . അദ്ദേഹത്തിന്റെ മരണത്തോടെ കുടുംബം തകർച്ചയുടെ വക്കിലായി.
രാകേഷ് മീണയ്‌ക്ക് നാല് പെൺമക്കളാണുള്ളത് . സരികയുടെ വിവാഹം കത്തുമാർ സ്വദേശി നരേന്ദ്ര മീണയുമായാണ് നടന്നത് . വിവാഹത്തിൽ സിആർപിഎഫ് സൈനികർ, ഉദ്യോഗസ്ഥർ , രാജ്ഗഡ് ഡെപ്യൂട്ടി പോലീസ് സൂപ്രണ്ട് മനീഷ മീണ, സിആർപിഎഫ് ബറ്റാലിയൻ ഉദ്യോഗസ്ഥർ എന്നിവർ സന്നിഹിതരായിരുന്നു.
വിവാഹസമയത്ത് സിആർപിഎഫ് ഫണ്ടിൽ നിന്ന് ഒന്നര ലക്ഷം രൂപ സരികയുടെ അക്കൗണ്ടിൽ നിക്ഷേപിച്ചിരുന്നു. സെൻട്രൽ ഗ്രൂപ്പ് ഒന്നാം അജ്മീർ ബറ്റാലിയനെ പ്രതിനിധീകരിച്ച് എസി, മിക്‌സി, ഇലക്‌ട്രോണിക് സ്റ്റൗ, മറ്റ് സാധനങ്ങൾ എന്നിവയും പണവും സമ്മാനമായി നൽകി .
പിതാവിനെ ഞങ്ങൾക്ക് മടക്കി കൊണ്ടുവരാൻ കഴിയില്ലെന്നും , എന്നാൽ സന്തോഷത്തിലും ദുഃഖത്തിലും കുടുംബത്തോടൊപ്പം ഉണ്ടാകുമെന്ന് സിആർപിഎഫ് സൈനികർ പറഞ്ഞു.
