അതുല്യ നടൻ തിലകന്റ കൊച്ചുമകൻ വെളളിത്തിരയിലേക്ക്. ഷമ്മി തിലകന്റെ മകൻ അഭിമന്യു തിലകനാണ് സിനിമയിലേക്ക് എത്തുന്നത്. ഉണ്ണി മുകുന്ദൻ നായകനായി ഹനീഫ് അദേനി സംവിധാനം ചെയ്യുന്ന മാർക്കോ എന്ന ചിത്രത്തിലൂടെയാണ് അരങ്ങേറ്റം. അഭിമന്യുവിനെ സ്വാഗതം ചെയ്ത് പോസ്റ്റർ അണിയറ പ്രവർത്തകർ പുറത്തുവിട്ടു.
ക്യൂബ്സ് ഇന്റർനാഷണൽ, ഉണ്ണി മുകുന്ദൻ ഫിലിംസ് എന്നീ ബാനറുകളിൽ ഷരീഫ് മുഹമ്മദും അബ്ദുൽ ഗദ്ധാഫും നിർമ്മാണവും വിതരണവും നിർവ്വഹിക്കുന്ന ആക്ഷൻ ചിത്രമാണ് മാർക്കോ. ചിത്രത്തിന്റെ ഹിന്ദി ഡബ്ബിങ് അവകാശം റെക്കോർഡ് തുകയ്‌ക്ക വിറ്റത് വാർത്തകളിൽ ഇടം പിടിച്ചിരുന്നു.
മൂന്നാർ കേന്ദ്രീകരിച്ച് സിനിമയുടെ ചിത്രീകരണം പുരോഗമിക്കുകയാണ്.
മലയാള സിനിമയുടെ ചരിത്രത്തിൽ ആദ്യമായി ഒരു വില്ലന്റെ സ്പിൻ ഒഫ് സിനിമ എന്ന പ്രത്യേകതയോടെയാണ് മാർക്കോ എത്തുന്നത്. മിഖായേൽ എന്ന ചിത്രത്തിൽ ഉണ്ണി മുകുന്ദൻ അവതരിപ്പിച്ച മാർക്കോ ജൂനിയറിനെ ആസ്പദമാക്കിയാണ് ചിത്രം ഒരുങ്ങുന്നത്. സിദ്ദിഖ്, ജഗദീഷ്, ആൻസൺ പോൾ, കബീർ ദുഹാൻസിംഗ് തുടങ്ങിയവരാണ് മറ്റ് താരങ്ങൾ.
