കപ്പിനും ചുണ്ടിനും ഇടയിൽ വച്ച് കിരീടം നഷ്ടപ്പെട്ട ഹൈദരാബാദ് താരങ്ങളെ ഡ്രസിംഗ് റൂമിലെത്തി ആശ്വസിപ്പിച്ചും അഭിനന്ദിച്ചും ടീം ഉടമ കാവ്യാ മാരൻ. മത്സരശേഷം ഡ്രസിംഗ് റൂമിലെത്തി കാവ്യ സംസാരിക്കുന്നതിന്റെ വീഡിയോ തങ്ങളുടെ സമൂഹമാദ്ധ്യമ അക്കൗണ്ടുകളിൽ ടീം തന്നെയാണ് പങ്കുവച്ചത്. ടി20 ക്രിക്കറ്റിനെ പുനർനിർവചിച്ചവരാണ് നമ്മുടെ ബാറ്റർമാരെന്നും കൊൽക്കത്ത ജയിച്ചിട്ടും ആളുകൾ ഹൈദരാബാദിനെ കുറിച്ച് പറയുന്നത് കേൾക്കുമ്പോൾ അഭിമാനം തോന്നുന്നുവെന്നും കാവ്യ പറഞ്ഞു.
‘ ടീമിനെ കുറിച്ചാണ് എല്ലാവരും സംസാരിക്കുന്നത്. വലിയ നേട്ടമാണത്. ബാറ്റിംഗിലും ബൗളിംഗിലും മികച്ചപ്രകടനമാണ് നിങ്ങൾ കാഴ്ചവച്ചത്. കഴിഞ്ഞ വർഷം ലീഗിൽ അവസാന സ്ഥാനക്കാരായാണ് ടീം ഫിനിഷ് ചെയ്തത്. നിങ്ങളുടെ മികച്ച പ്രകടനമാണ് ആരാധകർ അകമഴിഞ്ഞ പിന്തുണയോടെ സ്‌റ്റേഡിയത്തിലേക്ക് ഒഴുകിയെത്താൻ കാരണമായത്. കെകെആർ വിജയിച്ചെങ്കിലും നമ്മുടെ ടീമിനെ കുറിച്ചാണ് എല്ലാവരും സംസാരിക്കുന്നത്. ആരും നിരാശരായി ഇരിക്കരുത്. ഫൈനലിൽ എല്ലാ ടീമുകളും നമ്മളെ നിരീക്ഷിക്കുന്നുണ്ടായിരുന്നു. മറ്റ് മത്സരങ്ങളെ പോലെയല്ല ഫൈനലെന്നും എല്ലാവർക്കും ഹൃദയത്തിന്റെ ഭാഷയിൽ നന്ദിയെന്നും’ കാവ്യാ മാരൻ പറഞ്ഞു.
ടീം ഓരോ തവണയും മത്സരത്തിനായി ഇറങ്ങുമ്പോഴും ഗാലറിയിൽ പിന്തുണയുമായി കാവ്യയുണ്ടാകും. ടീമിന്റെ തോൽവിയിലും വിജയത്തിലുമെല്ലാം വികാരഭരിതയാകുന്ന കാവ്യയുടെ ഫോട്ടോകളും വീഡിയോകളുമെല്ലാം സമൂഹമാദ്ധ്യമങ്ങളിൽ വൈറലാകാറുണ്ട്. കൊൽക്കത്തയോട് ദയനീയ തോൽവി ഏറ്റുവാങ്ങിയതിന് പിന്നാലെ കാവ്യ വിങ്ങിപ്പൊട്ടി കരഞ്ഞിരുന്നു.
