മുസ്ലീം ലീഗിലെ വനിതാ പ്രവർത്തകരെ റോഡ് ഷോയിൽ നിന്നും വിലക്കിയ ലീഗ് നേതാവിനെ പരിഹസിച്ച് ബിജെപി വക്താവ് സന്ദീപ് വാര്യർ. വടകരയിൽ താലിബാൻ എംപി ഭരണം തുടങ്ങിയെന്നായിരുന്നു സന്ദീപ് വാര്യർ പറഞ്ഞത്. ഫെയ്സ്ബുക്ക് പോസ്റ്റിലൂടെയായിരുന്നു അദ്ദേഹം പ്രതികരിച്ചത്.
ഷാഫി പറമ്പിലിന്റെ വിജയാഘോഷത്തിൽ വനിതകൾ പങ്കെടുക്കരുതെന്ന് ലീഗ് നേതാവിന്റെ ശബ്ദസന്ദേശം പുറത്ത് വന്നിരുന്നു. ഇതിന് പിന്നാലെയാണ് സന്ദീപ് വാര്യർ പരിഹാസവുമായി എത്തിയത്. ലീഗിന്റെ കൂത്തുപറമ്പ് മണ്ഡലം സെക്രട്ടറി ഷാഹുൽ ഹമീദാണ് വനിതാ പ്രവർത്തകരെ വിലക്കിയത്. ഇന്നാണ് പാനൂരിൽ ഷാഫിയുടെ റോഡ് ഷോ നടക്കുന്നത്.
നിയുക്ത എംപിയുടെ സ്വീകരണ പരിപാടിയിൽ വനിതാ പ്രവർത്തകരുടെ സാന്നിധ്യം ഉണ്ടാകണമെന്നും അതിരുവിട്ടുള്ള ആഘോഷം വേണ്ടെന്നും അഭിവാദ്യം അർപ്പിച്ചാൽ മതിയെന്നുമാണ് ശബ്ദ സന്ദേശത്തിൽ പറയുന്നത്. മതപരമായ നിയന്ത്രണം അനുവദിക്കുന്നില്ല, ലീഗിന് ആക്ഷേപം വരാത്ത രീതിയിലാകണം ആഘോഷം, അച്ചടക്കം പാലിക്കണം, മറ്റു പാർട്ടികളിലെ വനിതാ പ്രവർത്തകരുടേത് പോലുള്ള ആവേശം വേണ്ട തുടങ്ങിയ നിർദ്ദേശങ്ങളാണ് വനിതാ പ്രവർത്തകർക്ക് നൽകിയത്.
