ജയ്‌പൂർ: വെറും 300 രൂപ വിലയുള്ള മുക്കുപണ്ടം നൽകി അമേരിക്കൻ വനിതയെ പറ്റിച്ച കടയുടമ കൈക്കലാക്കിയത് 6 കോടി രൂപ. രാജസ്ഥാനിലെ ജയ്‌പൂരിലാണ് സംഭവം. ചെറിഷ് എന്ന അമേരിക്കൻ വനിതയെയാണ് രാജസ്ഥാനിലെ ജോഹ്‌രി ബസാറിലെ കടയുടമ വിദഗ്‌ധമായി പറ്റിച്ചത്.
വിലപിടിപ്പുള്ള ആഭരണമെന്ന പേരിൽ വെള്ളിയിൽ സ്വർണം പൂശിയ ആഭരണം നൽകിയാണ് ഇയാൾ അമേരിക്കൻ വനിതയെ കബളിപ്പിച്ചത്. വാങ്ങിയ ആഭരണം അമേരിക്കയിൽ നടന്ന ഒരു എക്‌സിബിഷനിൽ പ്രദർശിപ്പിച്ചപ്പോഴാണ് മുക്കുപണ്ടമാണെന്ന് തിരിച്ചറിയുന്നത്. ഉടൻ തന്നെ യുവതി ഇന്ത്യയിലേക്കെത്തി കടയുടമയായ ഗൗരവ് സോണിയെ കണ്ടെത്തി. എന്നാൽ യുവതിയുടെ ആരോപണങ്ങളെല്ലാം ഇയാൾ നിഷേധിക്കുകയായിരുന്നു.
തുടർന്ന് ഇവർ കടയുടമയ്‌ക്കെതിരെ ജയ്‌പൂർ പൊലീസിൽ പരാതി നൽകി. യുവതി യുഎസ് എംബസിയുമായി ബന്ധപ്പെട്ടതിനെത്തുടർന്ന് എംബസി അധികൃതർ ജയ്‌പൂർ പൊലീസിനോട് സംഭവത്തിൽ വിശദമായ അന്വേഷണം ആവശ്യപ്പെട്ടു. 2022 ൽ ഇൻസ്റ്റഗ്രാമിലൂടെയാണ് കടയുടമയായ ഗൗരവ് സോണിയെ പരിചയപ്പെടുന്നതെന്ന് അമേരിക്കൻ യുവതി പൊലീസിനോട് പറഞ്ഞു.
