കുവൈത്ത് സിറ്റി: കുവൈത്ത് തീപിടിത്തത്തിൽ ഒരു ഭാരതീയൻ കൂടി മരിച്ചതായി സൂചന. ആശുപത്രിയിൽ ചികിത്സയിൽ കഴിഞ്ഞിരുന്ന ഒരാൾ കൂടി മരിച്ചെന്നാണ് കുവൈത്ത് മാദ്ധ്യമങ്ങൾ റിപ്പോർട്ട് ചെയ്യുന്നത്. മരിച്ചയാളുടെ പേര് വിവരങ്ങൾ ഉൾപ്പെടെയുള്ള വിശദാംശങ്ങൾ ലഭ്യമായിട്ടില്ല. മരിച്ചയാളെ തിരിച്ചറിയുന്നതിനുള്ള നടപടികൾ പുരോഗമിക്കുകയാണ്. അപകടത്തിൽ മരിച്ച 49 പേരെയും തിരിച്ചറിഞ്ഞിരുന്നു. ഇതിൽ 46 പേരും ഇന്ത്യക്കാരാണ്. 3 പേർ ഫിലിപ്പീൻസിൽ നിന്നുള്ളവരാണ്.
45 മൃതദേഹങ്ങളുമായി കുവൈത്തിൽ നിന്നും വ്യോമസേനയുടെ പ്രത്യേകവിമാനം തിരിച്ചിട്ടുണ്ട്. രാവിലെ 10 മണിയോടെ വിമാനം കൊച്ചിയിലെത്തും. നേരത്തെ രാവിലെ 8.30 ഓടെ എത്തുമെന്നായിരുന്നു അറിയിച്ചിരുന്നത്.
23 മലയാളികളും 7 തമിഴ്നാട് സ്വദേശികളും 1 കർണാക സ്വദേശിയും ഉൾപ്പെടെ 31 പേരുടെ മൃതശരീരങ്ങൾ കൊച്ചിയിൽ ഇറക്കും. മുഖ്യമന്ത്രി പിണറായി വിജയൻ, കേന്ദ്ര സഹമന്ത്രി സുരേഷ് ഗോപി, സംസ്ഥാന മന്ത്രിമാർ തുടങ്ങിയവർ മൃതദേഹങ്ങൾ ഏറ്റുവാങ്ങും. മറ്റ് സംസ്ഥാനങ്ങളിലുള്ളവരുടെ മൃതദേഹങ്ങൾ പിന്നീട് ഡൽഹിയിലേക്ക് കൊണ്ടു പോകും.
കൊച്ചിയിൽ 31 മൃതദേഹങ്ങളും പൊതു ദർശനത്തിന് വെക്കാനുള്ള സൗകര്യങ്ങളും ഒരുക്കിയിട്ടുണ്ട്. കേന്ദ്ര, സംസ്ഥാന സർക്കാരുകളും പ്രവാസി വ്യവസായികളും ഉൾപ്പെടെ മരിച്ചവരുടെ കുടുംബത്തിന് ധനസഹായം പ്രഖ്യാപിച്ചിട്ടുണ്ട്. ഇതിനു പുറമേ കുവൈത്ത് സർക്കാരും സഹായം നൽകും.
