പെട്ടന്ന് പണത്തിന് അത്യാവശ്യം വന്നാൽ പലപ്പോഴും ബാങ്ക് വായ്പകളെ ആശ്രയിക്കുന്നവരായിരിക്കും സാധാരമക്കാരേറെയും. ഭവനത്തിനും വിദ്യാഭ്യാസത്തിനുമൊക്കെയായിരിക്കും ബാങ്കുകളിൽ നിന്നും നാം പലപ്പോഴും വായ്പകൾ എടുക്കാറുള്ളത്. ഇത്തരത്തിൽ എസ്ബിഐയിൽ നിന്ന് വായ്പകൾ എടുക്കാൻ ഉദ്ദേശിക്കുന്നവരും എടുത്തവരുമാണ് നിങ്ങളെങ്കിൽ ഇതറിഞ്ഞോളൂ..
ഭവന, വാഹന വായ്പകളുടെ പലിശ നിരക്ക് കൂട്ടിയിരിക്കുകയാണ് സ്റ്റേറ്റ് ബാങ്ക് ഓഫ് ഇന്ത്യ. ഇപ്പോഴുള്ള പലിശയിൽ നിന്നും 0.10% വർദ്ധനവാണ് ഉണ്ടായിരിക്കുന്നത്. അതായത് എം സി എൽ ആർ ( മാർജിനൽ കോസ്റ്റ് ഓഫ് ഫണ്ട്‌സ് ബേസ്ഡ് ലെൻഡിംഗ് റേറ്റ്) അധിഷ്ഠിത വായ്പകളുടെ പലിശ നിരക്കാണ് എസ്ബിഐ ഉയർത്തിയിരിക്കുന്നത്.
ഇതോടെ എം സി എൽ ആർ അധിഷ്ഠിത വായ്പകളുടെ പലിശ നിരക്ക് 8.65 ശതമാനത്തിൽ നിന്ന് 8.75 ശതമാനമായി ഉയരും. മൂന്ന് വർഷത്തേക്കുള്ള ഇത്തരം വായ്പകളുടെ പലിശ നിരക്ക് 8.85 ശതമാനത്തിൽ നിന്നും 8.95 ശതമാനമായി ഉയർന്നിട്ടുണ്ട്. ഒരു മാസത്തെ എം സി എൽ ആർ പലിശ നിരക്ക് 8.2 ശതമാനത്തിൽ 8.3% ആയും മൂന്ന് മാസത്തെ വായ്പകളുടെ പലിശ നിരക്ക് 8.2 ശതമാനത്തിൽ നിന്നും 8.3 ശതമാനമായും കൂട്ടിയിട്ടുണ്ട്.
അതേസമയം സ്ഥിര നിക്ഷേപങ്ങൾക്കുള്ള പലിശ നിരക്കും എസ്ബിഐ കൂട്ടിയിട്ടുണ്ട്. 7 മുതൽ 45 ദിവസം വരെയുളള സ്ഥിര നിക്ഷേപങ്ങളുടെ പലിശ മൂന്നര ശതമാനമാക്കി ഉയർത്തിയിട്ടുണ്ട്.
