സൂര്യനിൽ നിന്നുള്ള അപകടകാരികളായ വികിരണങ്ങളെ തടയുന്ന അദൃശ്യമായ സംരക്ഷണ കവചമാണ് ഓസോൺ പാളി. എന്നാൽ ഈ പാളിക്ക് അനുദിനം വ്യതിയാനം സംഭവിച്ചുകൊണ്ടിരിക്കുകയാണ്. ഓസോൺ പാളിയുടെ നിശ്ചിത പ്രദേശത്ത് അതിന്റെ കനം കുറയുകയാണ്. ഇതിനെയാണ് ഓസോൺ വിള്ളൽ അഥവാ ഓസോൺ ശോഷണം എന്ന് പറയുന്നത്.
ബഹിരാകാശ മേഖലയിൽ പുത്തൻ കുതിപ്പ് സൃഷ്ടിക്കാനും മനുഷ്യന്റെ ജീവിതനിലവാരം ഉയർത്താനുമായി നിരവധി പരീക്ഷണങ്ങളാണ് നടന്നു കൊണ്ടിരിക്കുന്നത്. കൂട്ടത്തോടെ അയക്കുന്ന ഉപഗ്രഹങ്ങൾ ഭൂമിയുടെ കുട എന്നറിയപ്പെടുന്ന ഓസോൺ പാളിക്ക് തകരാർ സൃഷ്ടിക്കുമെന്നും വിള്ളലുകൾ വലുതാക്കുമെന്നാണ് ഏറ്റവുമൊടുവിലായി പഠനങ്ങൾ പറയുന്നത്.
ഇലോൺ മസ്കിന്റെ ഉടമസ്ഥതയിലുള്ള സ്പേസ്എക്സ് വിക്ഷേിപ്പിക്കുന്ന സ്റ്റാർലിങ്ക് ഉപഗ്രഹങ്ങൾക്കാണ് മുന്നറിയിപ്പ് നൽകിയിട്ടുള്ളത്. സതേൺ കാലിഫോർണിയ സർവകലാശാലയിലെ ഗവേഷകരാണ് മുന്നറിയിപ്പുമായി രംഗത്തെത്തിയത്. സ്റ്റാർലിങ്ക് അന്തരീക്ഷത്തിലേക്ക് അലുമിനിയം ഓക്സൈഡ് വാതകം പുറന്തള്ളുകയും ഇത് ഓസോൺ പാളിക്ക് ദോഷം ചെയ്യുമെന്നും പഠനം പറയുന്നു. ജിയോഫിസിക്കൽ റിസർച്ച് ലെറ്റേഴ്സ് എന്ന ജേണലിൽ പഠനം പ്രസിദ്ധീകരിച്ചിട്ടുണ്ട്.
ഇന്റർനെറ്റ് ഉപഗ്രഹങ്ങൾക്ക് അഞ്ച് വർഷമാണ് ആയുസ്. ലോ-എർത്ത് ഓർബിറ്റിൽ ഏകദേശം 8,000-ത്തിലധികം ഇന്റർനെറ്റ് ഉപഗ്രഹങ്ങളുള്ളത്. ഇതിൽ 6,000 എണ്ണവും സ്റ്റാർ ലിങ്കിന്റേതാണ്. ഇവയുടെ കാലവധി അവസാനിക്കുന്ന മുറയ്ക്ക് അന്തരീക്ഷത്തിൽ കത്തിയമരുന്ന വിധത്തിലാണ് വികസിപ്പിച്ചിരിക്കുന്നതെന്ന് ഗവേഷകർ പറഞ്ഞു. 6,000 ഉപഗ്രഹങ്ങൾ കത്തിയമരുന്നതോടെ ഏകദേശം 1,000 ടൺ അലുമിനിയം ഓക്സൈഡ് പുറന്തള്ളും. അതായാത്, 646 ശതമാനത്തിന്റെ വർദ്ധനവ്.
അലുമിനിയം ഓക്സൈഡുകൾ ക്ലോറിനുമായി രാസപ്രവർത്തനത്തിലേർപ്പെടും. ഓസോൺ പാളിയുടെ നാശത്തിന് ഇത് കാരണമാകും. 250 കിലോഗ്രാം ഭാരമുള്ള ഉപഗ്രഹം ഏകദേശം 30 കിലോ അലുമിനിയം ഓക്സൈഡാണ് പുറന്തള്ളുക. ദശാബ്ദങ്ങളോളം ഇത് അന്തരീക്ഷത്തിൽ തങ്ങി നിൽക്കും. 2016-22 കാലഘട്ടത്തിൽ ഇത്തരത്തിൽ ഓക്സൈഡിന്റെ ബഹിർഗമനം അന്തരീക്ഷത്തിൽ കൂടിയതായും ഗവേഷകർ കണ്ടെത്തി. വരും വർഷങ്ങളിലും ഉപഗ്രഹ വിക്ഷേപണം സ്പേസ്എക്സ് തുടരാനിരിക്കേയാണ് ഗവേഷകരുടെ മുന്നറിയിപ്പ്.