ചെന്നൈ : കള്ളക്കുറിച്ചിയിലെ കരുണാപുരത്ത് വിഷമദ്യം കഴിച്ച് മരിച്ചവരുടെ എണ്ണം 49 ആയി. 109 പേർ ആശുപത്രികളിൽ ചികിത്സയിലാണ്. പലരുടെയും നില അതീവ ഗുരുതരമായതിനാൽ മരണസംഖ്യ കുത്തനെ ഉയരുമെന്നാണ് കരുതുന്നത്. വിഷമദ്യം കഴിച്ച് വയറിളക്കവും കാഴ്ചക്കുറവും ബധിരതയും ബാധിച്ചത് 150ലധികം പേർക്കാണ് ഇവരിൽ 143 പേരെ കള്ളക്കുറിച്ചി, സേലം, വില്ലുപുരം, പുതുച്ചേരി എന്നിവിടങ്ങളിലെ ജിപ്മർ ആശുപത്രികളിൽ പ്രവേശിപ്പിച്ചു.
ഇന്ന് (ജൂൺ 21) രാവിലെ വരെയുള്ള കണക്കനുസരിച്ച്, കള്ളക്കുറിച്ചി സർക്കാർ ആശുപത്രിയിൽ 27 പേരും പുതുച്ചേരി ജിപ്‌മറിൽ 3 പേരും സേലം സർക്കാർ ആശുപത്രിയിൽ 15 പേരും വില്ലുപുരം ആശുപത്രിയിൽ 4 പേരും ഉൾപ്പെടെ ആകെ 49 പേർ മരിച്ചു.ഇവരിൽ നാലുപേർ സ്ത്രീകളും ഒരാൾ ട്രാൻസ്‌ജെൻഡറുമാണ്.
കള്ളക്കുറിച്ചിയിൽ 56 പേരും പുതുച്ചേരിയിൽ 16 പേരും സേലത്ത് 35 പേരും വില്ലുപുരത്ത് രണ്ട് പേരും ഉൾപ്പെടെ 109 പേർ കിടത്തി നിലവിൽ ചികിത്സയിലാണ്.
കലക്ടർ പ്രശാന്ത്, ജില്ലാ വിജിലൻസ് ഓഫീസർ പ്രദീപ് യാദവ്, തമിഴ്‌നാട് ഹെൽത്ത് പ്രോഗ്രാം ഡയറക്ടർ ഗോവിന്ദ റാവു എന്നിവർ ദുരിതബാധിതരുടെ വീടുകൾ സന്ദർശിച്ച് അനുശോചനം രേഖപ്പെടുത്തി. മരിച്ചവരുടെ മൃതദേഹങ്ങൾ പോസ്റ്റ്‌മോർട്ടം നടത്തി ആംബുലൻസിൽ ഓരോന്നായി വീട്ടിലെത്തിച്ചു. മിക്ക തെരുവുകളും മൃതദേഹങ്ങൾ കൊണ്ട് നിറഞ്ഞിരുന്നു.
മരിച്ച 49 പേരിൽ 11 പേരുടെ സംസ്‌കാരം കരുണാപുരം ശ്മശാനത്തിലും രണ്ടുപേരെ കല്ല്കുറിശ്ശി ശ്മശാനത്തിലും ഒരാളുടെ സംസ്‌കാരം മാമനന്തൂർ ശ്മശാനത്തിലുമാണ്. ഓരോന്ന് വീരചോലപുരം, മഡൂർ, പൊൽപ്പടകുറിശ്ശി ശ്മശാനങ്ങൾ, കള്ളക്കുറിച്ചി എഎൽസി സ്‌കൂൾ ഗേറ്റ് എന്നിവിടങ്ങളിലും സംസ്‌കരിച്ചു.
കഴിഞ്ഞ 18ന് കള്ളക്കുറിച്ചി നഗരസഭയുടെ അതിർത്തിയിലുളള കരുണാപുരത്ത് അനധികൃതമായി വിറ്റ വിഷം കലർത്തിയ മദ്യം വാങ്ങി കുടിച്ചവരാണ് ദുരന്തത്തിനിരയായത്. അന്ന് രാത്രി 11 മണിയോടെ 17 പേരാണ് ഗുരുതര ആരോഗ്യ പ്രശ്‌നങ്ങളെ തുടർന്ന് മരിച്ചത്.
അർദ്ധരാത്രിയോടെ മരണസംഖ്യ ക്രമാതീതമായി ഉയർന്നു. പുലർച്ചെയോടെ മരണസംഖ്യ 29 ആയി. തുടർന്ന് രോഗബാധിതരായ നിരവധി പേർ ചികിത്സയ്‌ക്കായി ആശുപത്രികളിൽ പ്രവേശിപ്പിക്കപ്പെടുകയും ചെയ്തു. രാവിലെ മരണസംഖ്യ 36 ആയി ഉയർന്നു. ഇന്നലെ വൈകുന്നേരത്തോടെ മരണസംഖ്യ 40 ആയി ഉയർന്നു. ഇന്ന് (ജൂൺ 21) രാവിലെ വരെയുള്ള കണക്കനുസരിച്ച് വിഷമദ്യം കുടിച്ച് മരിച്ചവരുടെ എണ്ണം 49 ആയി.
