കഴിഞ്ഞ ദിവസം വിവാഹിതയായ വിവാഹിതയായ ബോളിവുഡ് താരം സൊനാക്ഷി സിൻഹയ്‌ക്ക് ഭർത്താവ് നൽകിയ വിവാഹ സമ്മാനമാണ് ഇപ്പോൾ സോഷ്യൽ മീഡിയയിൽ ചർച്ച. വിലകൂടിയ ആഡംബരകാറായ ബിഎംഡബ്ല്യു i7 ഇലക്ട്രിക് സെഡാൻ ആണ് ഭർത്താവ് സഹീർ ഇഖ്ബാൽ സൊനാക്ഷിക്ക് സമ്മാനിച്ചത്. 2 കോടി രൂപ വിലമതിക്കുന്ന കാറാണ് ഇതെന്നാണ് റിപ്പോർട്ടുകൾ.
മുംബൈയിലെ ലിങ്കിംഗ് റോഡിലുള്ള ബാസ്റ്റിയൻ റെസ്റ്റോറന്റിൽ വിവാഹ പാർട്ടിക്കായി പുതിയ ബിഎംഡബ്ല്യു കാറിൽ വന്നിറങ്ങുന്ന നവദമ്പതികളുടെ വീഡിയോ വൈറലായി മാറിയിരിക്കുകയാണ്. കാറിന്റെ പിൻവശത്തെ സീറ്റിൽ ഇരുവരും കൈകോർത്തുപിടിച്ച് ഇരിക്കുന്ന ദൃശ്യങ്ങൾ വീഡിയോയിൽ കാണാം.
ജൂൺ 23 നായിരുന്നു ഇരുവരുടെയും വിവാഹം. സൊനാക്ഷിക്ക് മുംബൈയിലെ ബാന്ദ്രയിലുള്ള പുതിയ അപ്പാർട്ട്മെന്റിൽ വച്ചായിരുന്നു വിവാഹ ചടങ്ങുകൾ നടന്നത്. കഴിഞ്ഞവർഷം സെപ്റ്റംബറിലാണ് 36 നിലകളുള്ള ആഡംബര അപ്പാർട്ട്മെന്റ് നടി സ്വന്തമാക്കുന്നത്. കടൽ തീരത്തിന് അഭിമുഖമായി 4,210.87 ചതുരശ്ര അടിയിലായി വ്യാപിച്ചുകിടക്കുന്ന അപ്പാർട്ട്മെന്റിന് 11 കോടി രൂപ വിലവരുമെന്നാണ് റിപ്പോർട്ടുകൾ.
ഹൊറർ കോമഡി ചിത്രമായ ‘കക്കുട’യാണ് സൊനാക്ഷിയുടേതായി റിലീസിനൊരുങ്ങുന്ന ചിത്രം. ആദിത്യ സർപോട്ദാർ സംവിധാനം ചെയ്യുന്ന സിനിമ ആർഎസ്പി മൂവീസിന്റെ ബാനറിൽ റോണീ സ്‌ക്രീവാലയാണ് നിർമ്മിച്ചിരിക്കുന്നത്. റിതേഷ് ദേശ്മുഖ്, സാഖിബ് സലിം എന്നിവരും ചിത്രത്തിൽ പ്രധാന വേഷങ്ങളിലെത്തുന്നു. ചിത്രം ജൂലൈ 12 ന് തീയേറ്ററുകളിലെത്തും.
