എറണാകുളം: അങ്കമാലി താലൂക്ക് ആശുപത്രിയിൽ രോഗികളെ വലച്ച് സിനിമാ ചിത്രീകരണം. അത്യാഹിത വിഭാഗത്തിലാണ് സിനിമയുടെ ചിത്രീകരണം. ഫഹദ് ഫാസിലിന്റെ ഭാവന സ്റ്റുഡിയോസ് നിർമ്മിക്കുന്ന പെെങ്കിളി എന്ന സിനിമയുടെ ചിത്രീകരണമാണ് നടക്കുന്നത്.
രോഗികളെ ചികിത്സിക്കുമ്പോഴും സമീപത്ത് ചിത്രീകരണം നടന്നുവെന്നും രജിസ്ട്രേഷൻ കൗണ്ടർ താത്കാലികമായി അടച്ചെന്നും പരാതിയുണ്ട്. രാത്രിയിൽ നടന്ന ചിത്രീകരണത്തിനെതിരെയും രോഗികളും സഹായികളും രംഗത്തെത്തി. ലൈറ്റുകൾ ഓഫാക്കി അത്യാഹിത വിഭാഗം പ്രവർത്തനം മന്ദഗതിയിലാക്കിയെന്നും വാഹന പാർക്കിംഗിന് നിയന്ത്രണമേർപ്പെടുത്തിയെന്നുമാണ് രോഗികളുടെയും കൂട്ടിരിപ്പ്കാരുടെയും പരാതി.
ഷൂട്ടിംഗിന് അനുമതി വാങ്ങിയോ എന്ന കാര്യത്തിൽ ഇതുവരെയും വ്യക്തതയില്ല. സജിൻ ഗോപു, അനശ്വര രാജൻ എന്നിവരാണ് ചിത്രത്തിലെ പ്രധാന അഭിനേതാക്കൾ.