എറണാകുളം: അങ്കമാലി താലൂക്ക് ആശുപത്രിയിലെ സിനിമാ ഷൂട്ടിംഗിൽ കേസെടുത്തത് മനുഷ്യാവകാശ കമ്മീഷൻ. രോഗികളെ വലച്ച് അത്യാഹിത വിഭാഗത്തിൽ നടക്കുന്ന ഷൂട്ടിംഗിനെതിരെയാണ് മനുഷ്യാവകാശ കമ്മീഷന്റെ നടപടി. അനുമതി നൽകിയവർ 7 ദിവസത്തിനകം വിശദീകരണം സമർപ്പിക്കണമെന്നും കമ്മീഷൻ നിർദ്ദേശം നൽകി. എറണാകുളം ജില്ലാ മെഡിക്കൽ ഓഫീസർ, അങ്കമാലി താലൂക്ക് ആശുപത്രി സൂപ്രണ്ട് എന്നിവർക്കാണ് കമ്മീഷന്റെ നിർദ്ദേശം.
കഴിഞ്ഞ ദിവസം രാത്രി 9 മണിയോടെയാണ് ചിത്രീകരണം തുടങ്ങിയത്. രോഗികളെ ചികിത്സിക്കുമ്പോഴും സമീപത്ത് ചിത്രീകരണം നടന്നെന്നും രജിസ്ട്രേഷൻ കൗണ്ടർ താത്കാലികമായി അടച്ചെന്നുമുൾപ്പെടെ പരാതി ഉയർന്നിരുന്നു.
ഫഹദ് ഫാസിലിന്റെ ഭാവന സ്റ്റുഡിയോസ് നിർമ്മിക്കുന്ന പൈങ്കിളി എന്ന സിനിമയുടെ ചിത്രീകരണമാണ് ആശുപത്രിയിൽ നടക്കുന്നത്. അനശ്വര രാജനും സജിൻ ഗോപുവുമാണ് പ്രധാനവേഷങ്ങളിൽ എത്തുന്നത്.