ന്യൂഡൽഹി: നീറ്റ്-യുജി പരീക്ഷകൾ ഓൺലൈനായി നടത്താനുള്ള സാധ്യതകൾ കേന്ദം പരിശോധിക്കുന്നതായി റിപ്പോർട്ട്. ദേശീയ പരീക്ഷാ ബോർഡ് (NBE) പരീക്ഷ വീണ്ടും നടത്താനുള്ള മുന്നൊരുക്കത്തിലാണെന്നാണ് സൂചന. തീയതികൾ തിങ്കളാഴ്ചയോ ചൊവ്വാഴ്ചയോ പ്രഖ്യാപിച്ചേക്കും. കൂടുതൽ സുതാര്യവും സുരക്ഷിതവുമായി പരീക്ഷകൾ നടത്തുവാനുള്ള കേന്ദ്രസർക്കാർ നടപടികളുടെ ഭാഗമാണിത്.
മാറ്റിവച്ച യുജിസി-നെറ്റ് പരീക്ഷകളുടെ പുതുക്കിയ തീയതികൾ നാഷണൽ ടെസ്റ്റിംഗ് ഏജൻസി കഴിഞ്ഞ ദിവസം പുറത്തുവിട്ടിരുന്നു. ജോയിന്റ് CSIR UGC-NET പരീക്ഷകൾ ജൂലൈ 25 മുതൽ 27 വരെയും മാറ്റിവച്ച UGC -NET പരീക്ഷകൾ ഓഗസ്റ്റ് 21 നും സെപ്റ്റംബർ 8 നുമായി നടക്കും. സാധാരണ പേന-പേപ്പർ രീതിയിൽ നിന്നുംമാറി കമ്പ്യൂട്ടർ അധിഷ്ഠിത പരീക്ഷകളാകും ഇത്തവണ നടക്കുക.
വിദേശത്തുള്ള 14 നഗരങ്ങളിലടക്കം 571 നഗരങ്ങളിലെ 4,750 കേന്ദ്രങ്ങളിൽ മെയ് അഞ്ചിനാണ് ഈ വർഷത്തെ നീറ്റ്-യുജി പരീക്ഷ നടന്നത്. ജൂൺ നാലിന് ഫലം പ്രഖ്യാപിച്ചതിന് പിന്നാലെയാണ് ചോദ്യപേപ്പർ ചോർച്ച ഉൾപ്പടെയുള്ള ആരോപണങ്ങൾ ഉയർന്നത്. തുടർന്ന് ദ്രുതഗതിയിലുള്ള തുടർനടപടികൾ സ്വീകരിച്ച കേന്ദ്രസർക്കാർ സംഭവത്തിൽ വിശദമായ അന്വേഷണം പ്രഖ്യാപിക്കുകയും ചെയ്തിരുന്നു.
