തിരുവനന്തപുരം: തലസ്ഥാനത്ത് കാർഗിൽ യുദ്ധത്തിൽ വീരമൃത്യു വരിച്ച ക്യാപ്റ്റൻ ജെറി പ്രേംരാജിന്റെ സ്മാരകം ഉയരാത്തത് ദൗർഭാഗ്യകരമെന്ന് മുൻ കേന്ദ്രമന്ത്രി രാജീവ് ചന്ദ്രശേഖർ. 25 വർഷം മുമ്പ് കാർഗിൽ യുദ്ധത്തിൽ വീരമൃത്യു പ്രാപിച്ച ജെറി പ്രേംരാജിന് ആദരമർപ്പിച്ച് പുറപ്പെടുവിച്ച കുറിപ്പിലാണ് രാജീവ് ചന്ദ്രശേഖർ അഭിപ്രായം പങ്കുവച്ചത്.
‘ക്യാപ്റ്റൻ ജെറി പ്രേം രാജിന്റെ രാജ്യത്തിന് വേണ്ടിയുള്ള ത്യാഗത്തിന്റെ 25-ാം വാർഷികത്തിൽ അദ്ദേഹത്തിന് എന്റെ ആദരാഞ്ജലികൾ. ഓപ്പറേഷൻ വിജയ് സമയത്ത് ശത്രുക്കൾ വെടിയുതിർത്തപ്പോഴും അവസാന ശ്വാസം വരെയും അദ്ദേഹം യുദ്ധമുഖത്ത് പതറാതെ നിലകൊണ്ടു. 1999 ജൂലൈയിൽ ദ്രാസ് മേഖലയിൽ തങ്ങളുടെ ലക്ഷ്യങ്ങൾ നേടിയെടുക്കുന്നതിനായി മരണം വരിച്ച അദ്ദേഹത്തിന്റെ അചഞ്ചലത നിർണായകമായിരുന്നു. ക്യാപ്റ്റൻ രാജ് നമ്മുടെ രാജ്യത്തിന് വേണ്ടി പരമമായ ത്യാഗം ചെയ്തു’ – രാജീവ് ചന്ദ്രശേഖർ പറഞ്ഞു.
തിരുവനന്തപുരത്ത് നടന്ന അനുസ്മരണച്ചടങ്ങിൽ ജെറി പ്രേംരാജിന്റെ കുടുംബത്തെ കാണാൻ കഴിഞ്ഞത് അഭിമാനമായി കരുതുന്നു. രാജ്യത്തിന് വേണ്ടി ജീവൻബലിയർപ്പിച്ച ക്യാപ്റ്റന് വേണ്ടി സ്മാരകം വേണമെന്ന് ജനങ്ങൾ ആവശ്യമുന്നയിച്ചിരുന്നു. 25 വർഷത്തിനിടെ മാറിമാറി വന്ന സർക്കാരുകൾ ജെറി പ്രേം രാജിന്റെ സ്മാരകം തലസ്ഥാനത്ത് നിർമ്മിക്കാതിരിക്കുന്നത് ആദരവ് നിഷേധിക്കുന്നതിന് സമമാണെന്നും രാജീവ് ചന്ദ്രശേഖർ കുറ്റപ്പെടുത്തി.
