കാലാവസ്ഥ വ്യതിയാനം എമ്പുരാന്റെ ചിത്രീകരണത്തിന് വെല്ലുവിളിയാകരുതെന്ന പ്രാർത്ഥനയുമായി പൃഥ്വിരാജ് . ഗുജറാത്തിൽ നടക്കുന്ന ചിത്രീകരണത്തിനാണ് കാലവസ്ഥ വെല്ലുവിളിയാകുന്നത്.
‘‘പ്രിയപ്പെട്ട കാലാവസ്ഥാ ദൈവങ്ങളെ, ഇത് പൂര്‍ത്തിയാക്കാന്‍ എനിക്ക് നിങ്ങളുടെ കൈസഹായം വേണം’’–ആകാശത്ത് തെളിഞ്ഞ മഴവില്ലിന്റെ ചിത്രം ഇന്‍സ്റ്റഗ്രാം സ്റ്റോറി പങ്കുവച്ച് പൃഥ്വിരാജ് കുറിച്ചത് ഇങ്ങനെയാണ് .
ഒരു മാസമായി എമ്പുരാന്റെ ഏഴാമത്തെ ഷെഡ്യൂള്‍ ഗുജറാത്തില്‍ പുരോഗമിക്കുകയാണ്. സിനിമയില്‍ ഏറെ നിര്‍ണായകമായ സീനുകള്‍ ഉള്‍പ്പെടുന്ന ഏറ്റവും വലിയ ഷെഡ്യൂളാണ് ഗുജറാത്തില്‍ നടക്കുന്നത്.ജൂലൈ അവസാനത്തോടെ പൂര്‍ത്തിയാക്കുന്ന നിലയിലായിരുന്നു ഷെഡ്യൂള്‍ നിശ്ചയിച്ചിരിക്കുന്നത്. മോഹന്‍ലാല്‍, ടൊവിനോ തോമസ് എന്നിവരും ഉള്‍പ്പെടുന്നതാണ് എഴാം ഷെഡ്യൂള്‍.
ആശിര്‍വാദ് സിനിമാസിനു വേണ്ടി ആന്റണി പെരുമ്പാവൂരും ഒപ്പം രാജ്യത്തെ പ്രമുഖ നിര്‍മാതാക്കളായ ലെയ്കയും ചേര്‍ന്നാണ് സിനിമയ്‌ക്കായി പണം മുടക്കുന്നത്.മുരളി ഗോപിയാണ് കഥയും തിരക്കഥയും. മഞ്ജു വാര്യര്‍, ടൊവിനോ തോമസ്, ഇന്ദ്രജിത്ത്, സായ് കുമാര്‍, ബൈജു സന്തോഷ്, സാനിയ ഇയ്യപ്പന്‍, സച്ചിന്‍ ഖേദേക്കര്‍ എന്നിവരും ലൂസിഫറിലെ തുടര്‍ച്ചയായി ചിത്രത്തില്‍ അഭിനയിക്കുന്നുണ്ട്.
