ന്യൂഡൽഹി : ഹരിയാനയിലെ സ്കൂൾ വിദ്യാർത്ഥികൾ ഇനി ഗുഡ് മോർണിംഗിന് പകരം പറയുക ജയ് ഹിന്ദ് . വിദ്യാർത്ഥികളിൽ ദേശീയ ഐക്യവും ദേശസ്‌നേഹവും വർദ്ധിപ്പിക്കുക എന്ന ലക്ഷ്യത്തോടെ ഹരിയാന സർക്കാരിന്റെ വിദ്യാഭ്യാസ വകുപ്പ് ഓഗസ്റ്റ് 15 മുതൽ ഈ നിർദേശം നിർബന്ധമായും നടപ്പാക്കണമെന്ന് കാട്ടി വിജ്ഞാപനം പുറപ്പെടുവിച്ചു.
രണ്ട് പേജുള്ള ഈ വിജ്ഞാപനത്തിൽ കുട്ടികൾക്ക് ജയ് ഹിന്ദ് എന്ന് നിർബന്ധമാക്കിയത് എന്തടിസ്ഥാനത്തിലാണ് എന്നും ‘ജയ് ഹിന്ദ്’ എന്നതിന്റെ പ്രാധാന്യവും സർക്കാർ വിശദീകരിച്ചിട്ടുണ്ട്.ജില്ലാ-ബ്ലോക്ക് ഓഫീസർമാർക്കും വിദ്യാഭ്യാസ ഡയറക്ടർ നിർദ്ദേശം നൽകി.
ഓഗസ്റ്റ് 15-ന് ത്രിവർണ പതാക ഉയർത്തുന്നതിന് മുമ്പ് സ്‌കൂളുകളിൽ ജയ് ഹിന്ദ് മുഴക്കണമെന്ന് സ്‌കൂളുകൾക്കായി പുറത്തിറക്കിയ ഉത്തരവിൽ പറയുന്നു. കുട്ടികളിൽ ദേശസ്‌നേഹവും ദേശീയതയും വളർത്തുന്നതിനാണ് ഈ തീരുമാനം. ജയ് ഹിന്ദ് പറയുന്നത് ദേശീയ ഐക്യത്തെക്കുറിച്ചും നമ്മുടെ രാജ്യത്തിന്റെ ചരിത്രത്തെക്കുറിച്ചും സ്കൂൾ കുട്ടികൾക്ക് അറിവ് പകർന്ന് നൽകുമെന്നും ഉത്തരവിൽ പറയുന്നു.
