തങ്ങളുടെ iQube ഇലക്ട്രിക് സ്കൂട്ടറിന്റെ പ്രത്യേക പതിപ്പ് അവതരിപ്പിച്ച് ടിവിഎസ് മോട്ടോർ കമ്പനി. 1.20 ലക്ഷം രൂപ എക്സ്-ഷോറൂം വിലയുള്ള ടിവിഎസ് iQube സെലിബ്രേഷൻ എഡിഷൻ 3.4kWh വേരിയൻ്റിനെ അടിസ്ഥാനമാക്കിയുള്ളതാണ്. സെലിബ്രേഷൻ എഡിഷൻ എസ് വേരിയൻ്റിലും ലഭ്യമാണ്( 1.29 ലക്ഷം രൂപ).
ഇത് വെറും 1,000 യൂണിറ്റുകൾ മാത്രമായി പരിമിതപ്പെടുത്തിയിരിക്കുന്നു. ഈ എക്‌സ്‌ക്ലൂസീവ് എഡിഷന്റെ ബുക്കിംഗ് ഓഗസ്റ്റ് 15-ന് ആരംഭിച്ചു കഴിഞ്ഞു. ഡെലിവറി ഓഗസ്റ്റ് 26-ന് ആരംഭിക്കും.
ടിവിഎസ് iQube സെലിബ്രേഷൻ എഡിഷൻ ഡ്യുവൽ-ടോൺ കളർ സ്കീമിലാണ് എത്തിയിരിക്കുന്നത്. ഇന്ത്യയുടെ സ്വാതന്ത്ര്യ ദിനവുമായി ബന്ധപ്പെട്ട് ഇറക്കിയതിനാൽ എൽഇഡി ഡിആർഎല്ലുകൾക്ക് മുകളിലായി ഒരു ചെറിയ ഇന്ത്യൻ ഫ്ലാഗും സ്റ്റാൻഡേർഡ് മോഡലുകളിൽ നിന്ന് വേറിട്ടുനിൽക്കുന്ന ‘സെലിബ്രേഷൻ എഡിഷൻ’ ബാഡ്ജും വാഹനത്തിന് കമ്പനി നൽകിയിരിക്കുന്നു.
പെർഫോമൻസിന്റെ കാര്യത്തിൽ, ടിവിഎസ് iQube സെലിബ്രേഷൻ പതിപ്പ് സാധാരണ iQube-ൽ നിന്ന് മാറ്റമില്ലാതെ തുടരുന്നു. 6 bhp ഇലക്ട്രിക് മോട്ടോറുമായി ജോടിയാക്കിയ 3.4kWh ബാറ്ററിയാണ് ഇത് നൽകുന്നത്. വെറും 4.2 സെക്കൻഡിനുള്ളിൽ 0 മുതൽ 40 km/h വേഗത കൈവരിക്കാൻ സ്കൂട്ടറിനെ പ്രാപ്തമാക്കുന്നു, പരമാവധി വേഗത 78 km/h. ഒരു തവണ ചാർജ് ചെയ്താൽ 100 കിലോമീറ്റർ റേഞ്ച് ഈ ബാറ്ററി വാഗ്ദാനം ചെയ്യുന്നു. 650W ചാർജർ ഉപയോഗിച്ച്, ഏകദേശം 4 മണിക്കൂറും 30 മിനിറ്റും കൊണ്ട് iQube 0 മുതൽ 80 ശതമാനം വരെ ചാർജ് ചെയ്യാം. സ്കൂട്ടർ രണ്ട് റൈഡിംഗ് മോഡുകളും വാഗ്ദാനം ചെയ്യുന്നു – പവർ, ഇക്കോണമി.
