ബോളിവുഡ് സിനിമാ ലോകത്തേക്ക് അരങ്ങേറ്റം കുറിക്കാനൊരുങ്ങി ഇന്ദ്രജിത്ത്. അനുരാഗ് കശ്യപ് സംവിധാനം ചെയ്യുന്ന ചിത്രത്തിലാണ് ഇന്ദ്രജിത്ത് അഭിനയിക്കുന്നത്. അനുരാഗ് കശ്യപിനൊപ്പമുള്ള ചിത്രം ഫെയ്സ്ബുക്കിൽ പങ്കുവച്ചുകൊണ്ട് ഇന്ദ്രജിത്ത് തന്നെയാണ് ഇക്കാര്യം അറിയിച്ചത്. എന്റെ ആദ്യ ബോളിവുഡ് ചിത്രം സംവിധായകൻ അനുരാഗ് കശ്യപിനൊപ്പം ആയതിൽ വളരെയധികം സന്തോഷമുണ്ടെന്ന് ഇന്ദ്രജിത്ത് ഫെയ്സ്ബുക്കിൽ കുറിച്ചു.
അനുരാഗ് കശ്യപിനെ പോലെ പ്രഗത്ഭനായ സംവിധായകനൊപ്പം പ്രവർത്തിക്കാനുള്ള ആകാംക്ഷയിലാണ് താനെന്നും ഇനിയുള്ള നല്ല ദിവസങ്ങൾക്കായി ആശംസകളെന്നും ഇന്ദ്രജിത്ത് കുറിച്ചു. ഇന്ദ്രജിത്തിന് മറുപടിയുമായി അനുരാഗ് കശ്യപും രംഗത്തെത്തി. നിങ്ങളോടൊപ്പം പ്രവർത്തിക്കുന്നതിൽ തനിക്കും സന്തോഷമുണ്ടെന്നും ഇതൊരു തുടക്കം മാത്രമാണെന്നും അനുരാഗ് കശ്യപ് പറഞ്ഞു. “ഹിന്ദി സിനിമാ മേഖലയിൽ അഭിനയിക്കുന്ന പല അഭിനേതാക്കളെക്കാളും നിങ്ങൾ നന്നായി ഹിന്ദി സംസാരിക്കുന്നുണ്ട്. നിങ്ങൾ എന്നും എന്റെ സഹോദരന്റെ സ്ഥാനത്തായിരിക്കും” എന്നായിരുന്നു അനുരാഗ് കശ്യപിന്റെ മറുപടി.
ചിത്രത്തിന്റെ കൂടുതൽ വിവരങ്ങൾ ഒന്നും അണിയറപ്രവർത്തകർ പുറത്തുവിട്ടിട്ടില്ല. തമിഴ് ചിത്രമായ മഹാരാജയിൽ വില്ലൻ കഥാപാത്രമായി അനുരാഗ് കശ്യപ് അഭിനയിച്ചിരുന്നു. ചിത്രത്തിലെ പ്രകടനത്തിന് പ്രേക്ഷകരുടെ ഭാഗത്ത് നിന്ന് മികച്ച പ്രതികരണങ്ങളാണ് ലഭിച്ചത്.
