ന്യൂയോർക്ക്: ബോയിംഗിന്റെ സ്റ്റാർലൈനർ പേടകം സുരക്ഷിതമായി ഭൂമിയിൽ ഇറങ്ങി. ന്യൂ മെക്സിക്കോയിലെ വൈറ്റ് സാൻഡ്സ് സ്പേസ് ഹാർബറിനു സമീപം രാവിലെ 9.31നാണ് പേടകം ലാൻഡ് ചെയ്തത്. ആറ് മണിക്കൂർ സമയം എടുത്താണ് സ്പേസ് എക്സ് മടക്കയാത്ര പൂർത്തിയാക്കിയത്. ഇന്ന് പുലർച്ചെ മൂന്നരയോടെയാണ് പേടകം അന്താരാഷ്ട്ര ബഹിരാകാശ നിലയത്തിൽ നിന്ന് അൺഡോക്ക് ചെയ്തത്.
മാസങ്ങൾ നീണ്ട അനിശ്ചിതത്വത്തിനൊടുവിലാണ് സ്റ്റാർലൈനർ പേടകത്തെ ഭൂമിയിലേക്ക് തിരികെ എത്തിക്കാനുള്ള തീരുമാനം എടുക്കുന്നത്. ബഹിരാകാശ നിലയത്തിലേക്കുള്ള യാത്രയിൽ ഉണ്ടായിരുന്ന സുനിത വില്ല്യംസും ബുച്ച് വിൽമോറും ഇല്ലാതെയാണ് പേടകം ഭൂമിയിലേക്ക് മടങ്ങി എത്തിയത്. സ്റ്റാർലൈനർ പേടകം സുരക്ഷിതമായി ലാൻഡ് ചെയ്യുന്നതിന്റെ വീഡിയോ നാസ പുറത്ത് വിട്ടിട്ടുണ്ട്.
The #Starliner spacecraft is back on Earth.
At 12:01am ET Sept. 7, @BoeingSpace’s uncrewed Starliner spacecraft landed in White Sands Space Harbor, New Mexico. pic.twitter.com/vTYvgPONVc
— NASA Commercial Crew (@Commercial_Crew) September 7, 2024
നാസയും സ്വകാര്യ കമ്പനിയായ ബോയിംഗും സഹകരിച്ച് നടത്തിയ ആദ്യ ബഹിരാകാശ യാത്രയായിരുന്നു ക്രൂ ഫ്ളൈറ്റ് ടെസ്റ്റ് എന്ന് പേരിട്ട ഈ ദൗത്യം. സ്റ്റാർലൈനറിന്റെ സർവ്വീസ് മൊഡ്യൂളിൽ കണ്ടെത്തിയ ഹീലിയം ചോർച്ചയും, സാങ്കേതിക പ്രശ്നങ്ങളുമാണ് യാത്ര നീളുന്നതിന് കാരണമായത്. എട്ട് ദിവസം കൊണ്ട് ദൗത്യം പൂർത്തിയാക്കി സുനിതയും, ബുച്ച് വിൽമോറുമായി മടങ്ങാനായിരുന്നു തീരുമാനിച്ചതെങ്കിലും, അപകടസാധ്യതകൾ മുന്നിൽ കണ്ട് ഇരുവരോടും ഐഎസ്എസിൽ തന്നെ തുടരാൻ നാസ നിർദ്ദേശിക്കുകയായിരുന്നു.
