തിരുവനന്തപുരം: മാദ്ധ്യമങ്ങളിൽ പ്രചരിക്കുന്ന വാർത്തകൾ കണ്ട് മലയാളസിനിമ തകർന്ന് തരിപ്പണമാകുമോ എന്ന് സംശയിച്ചിരുന്നുവെന്നും, ഈ സമയം കിഷ്‌കിന്ധാ കാണ്ഡം കണ്ടപ്പോൾ ആഹ്‌ളാദത്തേക്കാൾ ഏറെ ആശ്വാസം തോന്നിയെന്നും സംവിധായകൻ സത്യൻ അന്തിക്കാട്. വിജയഫോർമുലയെന്നു പറയപ്പെടുന്ന ഒന്നിനേയും ആശ്രയിക്കാതെ ഒരു വിജയചിത്രം ഒരുക്കാമെന്ന് സംവിധായകൻ ദിൻജിത്തും തിരക്കഥാകൃത്തും ക്യാമറാമാനുമായ ബാഹുൽ രമേഷും തെളിയിച്ചിരിക്കുകയാണെന്നും സത്യൻ അന്തിക്കാട് പ്രശംസിച്ചു.
ആസിഫ് അലിയും വിജയരാഘവനും അപർണ ബാലമുരളിയും അവതരിപ്പിച്ച കഥാപാത്രങ്ങളേയും അവരുടെ അഭിനയ മികവിനേയും സത്യൻ അന്തിക്കാട് പ്രശംസിക്കുന്നു. ചിത്രത്തിൽ കാണിക്കുന്ന വീടും പരിസരവും സിനിമ കണ്ടിറങ്ങിയാലും മനസ്സിൽ നിന്നു മായില്ലെന്നും അദ്ദേഹം പറയുന്നു. ചിത്രത്തിനൊരുക്കിയ സംഗീതത്തേയും, നിർമ്മാണ മേഖലയിൽ പ്രവർത്തിച്ചവരേയും സത്യൻ അന്തിക്കാട് സമൂഹമാദ്ധ്യമത്തിൽ പങ്കുവച്ച കുറിപ്പിലൂടെ പ്രശംസിക്കുന്നു. ഏത് പ്രതിസന്ധികളേയും മറികടക്കാൻ നമുക്ക് നല്ല സിനിമകളുണ്ടായാൽ മാത്രം മതിയെന്നും, കിഷ്‌കിന്ധാ കാണ്ഡം’ തീർച്ചയായും ഒരു മറുപടിയാണെന്നും അദ്ദേഹം കുറിച്ചു.
സത്യൻ അന്തിക്കാടിന്റെ കുറിപ്പിന്റെ പൂർണരൂപം,
മാധ്യമങ്ങളിൽ പ്രചരിക്കുന്ന വാർത്തകൾ കണ്ട് മലയാളസിനിമ തകർന്ന് തരിപ്പണമാകുമോ എന്ന് സംശയിച്ചിരിക്കുമ്പോഴാണ് ‘കിഷ്‌കിന്ധാ കാണ്ഡം’ കണ്ടത്. ആഹ്‌ളാദത്തേക്കാളേറെ ആശ്വാസമാണ് തോന്നിയത്. വിജയഫോർമുലയെന്നു പറയപ്പെടുന്ന ഒന്നിനേയും ആശ്രയിക്കാതെ ഒരു വിജയചിത്രം ഒരുക്കാമെന്ന് സംവിധായകൻ ദിൻജിത്തും തിരക്കഥാകൃത്തും ക്യാമറാമാനമായ ബാഹുൽ രമേഷും തെളിയിച്ചിരിക്കുന്നു.
വനമേഖലയോടു ചേർന്ന ആ വീടും പരിസരവും സിനിമ കണ്ടിറങ്ങിയാലും മനസ്സിൽ നിന്നു മായില്ല.
സൂക്ഷ്മമായ അഭിനയത്തിലൂടെയും ശബ്ദ നിയന്ത്രണത്തിലൂടെയും ആസിഫ് അലി അതിശയിപ്പിച്ചു എന്നു വേണം പറയാൻ. അഭിനയ സാദ്ധ്യതയുള്ള വേഷം കിട്ടിയാൽ വിജയരാഘവൻ മിന്നിത്തിളങ്ങുമെന്ന് വീണ്ടും ഓർമ്മിപ്പിക്കുന്നു. അപർണാ ബാലമുരളിയും എത്ര പക്വതയോടെയാണ് ആ കഥാപാത്രത്തെ അവതരിപ്പിച്ചത് ! സംഗീതമൊരുക്കിയ മുജീബിനും പുതിയ തലമുറയിൽ വിശ്വാസമർപ്പിച്ച് ഒപ്പം നിന്ന ഗുഡ്വിൽ എന്റർടൈൻമെൻറ്‌സിന്റെ ജോബി ജോർജ്ജിനും സ്‌നേഹവും അഭിനന്ദനങ്ങളും.
എല്ലാ പ്രതിസന്ധികളേയും മറി കടക്കാൻ നമുക്ക് നല്ല സിനിമകളുണ്ടായാൽ മാത്രം മതി. ‘കിഷ്‌കിന്ധാ കാണ്ഡം’ തീർച്ചയായും ഒരു മറുപടിയാണ്.
