തോല്‍വിയറിയാതെ മുന്നേറി ഇന്ത്യ; ഏഷ്യൻ ചാമ്പ്യൻസ് ട്രോഫിയിൽ ദക്ഷിണകൊറിയയെ തകർത്ത് ഫൈനലിൽ

ബിജിം​ഗ്: ഏഷ്യൻ ചാമ്പ്യന്‍സ് ട്രോഫി ഹോക്കി സെമിയില്‍ ദക്ഷിണകൊറിയയെ തകര്‍ത്ത് ഇന്ത്യ ഫൈനലില്‍. ഒന്നിനെതിരെ നാല് ഗോളിന് തകർത്താണ് നിലവിലെ ചാംപ്യന്മാരായ ഇന്ത്യ കലാശപ്പോരിന് യോഗ്യത നേടിയത്.

ക്യാപ്റ്റൻ ഹർമൻപ്രീത് സിം​ഗിന്റെ ഇരട്ട ​ഗോളാണ് നിർണായകമായത്. 19, 45 മിനിറ്റുകളിലായിരുന്നു ക്യാപ്റ്റന്റെ ഗോളുകള്‍. 13-ാം മിനിറ്റില്‍ ഉത്തം സിം​ഗും 32-ാം മിനിറ്റില്‍ ജര്‍മന്‍പ്രീത് സിം​ഗും ഇന്ത്യയ്‌ക്കായി വലകുലുക്കി. 33-ാം മിനിറ്റില്‍ യാങ് ജി ഹുനാണ് കൊറിയയുടെ ആശ്വാസ ഗോള്‍ നേടിയത്.

ടൂര്‍ണമെന്റില്‍ തോല്‍വിയറിയാതെ മുന്നേറുന്ന ഇന്ത്യ അഞ്ചാമത്തെ ചാംപ്യൻസ് ട്രോഫി കിരീടം ലക്ഷ്യമിട്ട് നാളെ ആതിഥേയരായ ചൈനയെ നേരിടും.