തിരുവനന്തപുരം: അമ്മൂമ്മയുടെ കൈയിലിരുന്ന ഒൻപത് മാസം പ്രായമുള്ള കുഞ്ഞിനെ തട്ടിക്കൊണ്ടുപോകാൻ ശ്രമിച്ച ഇതര സംസ്ഥാന തൊഴിലാളി പിടിയിൽ. തിരുവനന്തപുരം കഴക്കൂട്ടത്താണ് സംഭവം. മദ്യലഹരിയിലായിരുന്ന അസാം സ്വദേശി നൂറുൽ ആദം (47) ആണ് പിടിയിലായത്. സംഭവത്തിൽ മുത്തശ്ശിക്കും പരിക്കേറ്റു.
ഇന്ന് രാത്രി ഏഴര മണിയോടെ കഴക്കൂട്ടം മെഡിക്കൽ സ്റ്റോറിൽ മരുന്നു വാങ്ങാനെത്തിയപ്പോഴായിരുന്നു സംഭവം. കുട്ടിയെ തട്ടിയെടുക്കാൻ ശ്രമിക്കവേ തടഞ്ഞപ്പോഴാണ് മുത്തശ്ശിക്ക് പരിക്കേറ്റത്. പിടിവലിയിൽ കുഞ്ഞിനും പരിക്കേറ്റു. സംഭവം കണ്ട നാട്ടുകാർ ഇയാളെ തടഞ്ഞുവച്ച് പൊലീസിൽ ഏൽപ്പിക്കുകയായിരുന്നു. പരിക്കേറ്റ കുഞ്ഞിനെയും കുഞ്ഞിന്റെ അമ്മൂമ്മയെയും സ്വകാര്യ ആശുപത്രിയിൽ പ്രവേശിപ്പിച്ചു.
