ഇഷ്ടമില്ലാത്ത വിവാഹങ്ങൾക്ക് നിന്നുകൊടുക്കുമ്പോൾ ” ദൈവമേ ഇതൊന്ന് മുടക്കാൻ ആരെങ്കിലും വന്നിരുന്നെങ്കിൽ’ എന്ന് തോന്നുന്ന സാഹചര്യത്തിലൂടെ പലരും കടന്നു പോയിരിക്കും. ദൈവ ദൂതനെ പോലെ ആരെങ്കിലും താത്പര്യമില്ലാത്ത വിവാഹത്തിൽ നിന്നും നിങ്ങളെ രക്ഷപ്പെടുത്തിയാൽ എങ്ങനെയിരിക്കും? 47,000 രൂപ മുടക്കാൻ തയ്യാറാണെങ്കിൽ ഇഷ്ടമില്ലാത്ത വിവാഹങ്ങൾ ഇനി പ്രശ്നമല്ലെന്നാണ് ഏണസ്റ്റോ റെനാറസ് എന്ന കമ്പനി പറയുന്നത്.
സ്പെയിനിലാണ് ഈ കമ്പനി പ്രവർത്തിക്കുന്നത്. ‘വെഡ്ഡിംഗ് ഡെസ്ട്രോയേഴ്സ്’ എന്നാണ് സ്പെയിനിൽ ഇവർ അറിയപ്പെടുന്നത്. വിവാഹങ്ങൾ മുടക്കിയാണ് താൻ പണം സമ്പാദിക്കുന്നതെന്നാണ് കമ്പനി ഉടമയായ ഏണസ്റ്റോ പറയുന്നത്. വിവാഹങ്ങൾ മുടക്കിയാൽ എങ്ങനെ പണം സമ്പാദിക്കാൻ സാധിക്കുമെന്നായിരിക്കും നിങ്ങൾ ഇപ്പോൾ ആലോചിക്കുന്നത്. അതും ഏണസ്റ്റോ തന്നെ വിശദമായി പറയുന്നുണ്ട്.
തമാശയ്ക്കായി ഓൺലൈനിൽ പോസ്റ്റ് ചെയ്ത ഒരു പരസ്യമാണ് ഏണസ്റ്റോയുടെ ജീവിതം മാറ്റി മറിച്ചത്. ” താത്പര്യമില്ലാത്ത വിവാഹങ്ങൾക്ക് നിൽക്കുകയാണോ? എങ്ങനെ എതിർക്കുമെന്നും അറിയുന്നില്ലേ? വിവാഹത്തിൽ നിന്നും ഒഴിവാകണമെന്നുണ്ടോ? പരിഭ്രമിക്കേണ്ട, നിങ്ങളുടെ വിവാഹത്തെ ഞാൻ എതിർക്കാം..” എന്ന അടിക്കുറിപ്പോടെ പങ്കുവച്ച പരസ്യമാണ് നിമിഷ നേരങ്ങൾക്കുള്ളിൽ അദ്ദേഹത്തിന്റെ ജീവിതം മാറ്റി മറിച്ചത്.
പരസ്യം ശ്രദ്ധയിൽപ്പെട്ടതും നിരവധി പേർ ഏണസ്റ്റോയുടെ സഹായത്തിനായി ഓടിയെത്തി. വിവാഹം മുടക്കുന്നതിനായി 500 യൂറോയും ( 47,000 രൂപ) അദ്ദേഹം ഈടാക്കാൻ തുടങ്ങി. സ്ഥലവും സമയവും പറഞ്ഞു കൊടുത്താൽ കൃത്യസമയത്ത് അവിടെയെത്തി ക്ലയന്റിന്റെ യഥാർത്ഥ കാമുകനായി വേഷമിട്ട് ‘ കല്യാണം മുടക്കി’ താത്പര്യമില്ലാത്ത വിവാങ്ങൾ മുടക്കി തരും. ഇനി വിവാഹത്തിൽ പങ്കെടുക്കാൻ വന്ന ബന്ധുക്കൾ ആരങ്കിലും മർദ്ദിക്കുകയാണെങ്കിലും അതെല്ലാം ഏറ്റുവാങ്ങാൻ തയ്യാറാണെന്നും കമ്പനി ഉടമ പറയുന്നുണ്ട്. എന്നാൽ കിട്ടുന്ന ഓരോ അടിക്കും 50 യൂറോ വീതം നൽകണം. ഡിസംബർ വരെ താൻ ഇത്തരത്തിൽ വിവാഹം മുടക്കുന്നതുമായി ബന്ധപ്പെട്ട് തിരക്കിലാണെന്നും ഏണസ്റ്റോ പറഞ്ഞു.
