കാർത്തിക് ആര്യൻ നായകനാകുന്ന ഭൂൽ ഭുലയ്യ 3യുടെ ട്രെയിലറെത്തി. അനീസ് ബസ്മീ സംവിധാനം ചെയ്യുന്ന ചിത്രത്തിൽ വിദ്യാബാലൻ തന്റെ ഐക്കോണിക് കാരക്ടറായ “മഞ്ജുലിക” ആയി വീണ്ടുമെത്തുന്നതാണ് ഏറ്റവും വലിയ പ്രത്യേകത. ഒപ്പം മാധുരി ദീക്ഷിതും പ്രധാന കഥാപാത്രമായി ചിത്രത്തിലുണ്ട്.
ഹൊറർ കോമഡി ജോണറിൽ അണിയിച്ചൊരുക്കിയിരിക്കുന്ന ചിത്രം നവംബർ ഒന്നിനാണ് റിലീസ് ചെയ്യുന്നത്. മൂന്നര മിനിട്ട് ദൈർഘ്യമുള്ള ട്രെയിലറിൽ റൂഹ് ബാബയായി എത്തുന്ന കാർത്തിക് ആര്യന്റെ വൺമാൻ ഷോയാണ് കാണാനാകുന്നത്. ട്രെയിലറിൽ രണ്ട് മഞ്ജുലികയെ(നാഗവള്ളി) യും കാണാം. തൃപ്തി ദിമ്രി, രാജ്പാല്‍ യാദവ്, സഞ്ജയ് മിശ്ര എന്നിവര്‍ മറ്റു പ്രധാന താരങ്ങളാകുന്നു.
മലയാളത്തിലെ ക്ലാസിക് ചിത്രമായ മണിച്ചിത്രത്താഴിന്റെ ഹിന്ദി റീമേക്കായിരുന്നു പ്രിയദർശൻ സംവിധാനം ചെയ്ത ഭൂൽ ഭുലയ്യ. 2007 ൽ 32 കോടി മുതല്‍ മുടക്കില്‍ ഒരുങ്ങിയ ചിത്രം 82.8 കോടിയാണ് ബോക്സോഫീസിൽ നിന്ന് നേടിയത്. ഇതിൽ ശോഭന അവതരിപ്പിച്ച കഥാപത്രത്തെയാണ് വിദ്യാബാലൻ റിക്രിയേറ്റ് ചെയ്തത്. വിദ്യക്ക് ഏറെ അഭിനന്ദനം ലഭിച്ച പ്രകടനമായിരുന്നു ചിത്രത്തിലേത്.
മണിച്ചിത്രത്താഴ് ഒരു സിനിമ മാത്രമായപ്പോൾ ഹിന്ദിയിൽ ഭൂൽ ഭുലയ്യ രണ്ടാമതും വന്നു. 2022 കാർത്തിക് ആര്യൻ നായകനായ ചിത്രം 266 കോടിയാണ് ബോക്സോഫീസിൽ നിന്ന് നേടിയത്. അനീസ് ബസ്മീയായിരുന്നു സംവിധാനം. കിയാര അദ്വാനിയും തബുവും അടക്കമുള്ളവർ പ്രധാന കഥാപാത്രമായി.
