ബെംഗളൂരു: സഹപ്രവർത്തകയായ യുവതിയുടെ വസ്ത്രധാരണം ശരിയല്ലെന്ന് പറഞ്ഞ് അവരുടെ ഭർത്താവിന് ഭീഷണി മെസേജ് അയച്ച യുവാവിന്റെ ജോലി നഷ്ടമായി. യുവതിയുടെ ഭർത്താവിന്റെ പരാതിയുടെ അടിസ്ഥാനത്തിൽ ഇയാൾ ജോലി ചെയ്തിരുന്ന കമ്പനി യുവാവിനെ പുറത്താക്കുകയായിരുന്നു. യുവതിക്കെതിരെ ആസിഡ് ആക്രമണം നടത്തുമെന്ന് ഇയാൾ ഭീഷണി സന്ദേശം അയച്ചുവെന്നാണ് ഭർത്താവിന്റെ പരാതി.
ബെംഗളൂരുവിലെ ‘എറ്റിയോസ് ഡിജിറ്റൽ’ എന്ന കമ്പനിയിലെ ജീവനക്കാരനായ നികിത് ഷെട്ടിയെയാണ് ജോലിയിൽ നിന്നും പിരിച്ചുവിട്ടത്. മാദ്ധ്യമ പ്രവർത്തകനായ ഷഹബാസ് അൻസാറാണ് തന്റെ ഭാര്യയുടെ വസ്ത്ര ധാരണത്തിന്റെ പേരിൽ അവർക്കെതിരെ നികിത് ഷെട്ടി ഭീഷണി മുഴക്കുന്നുവെന്ന് പരാതിപ്പെട്ടത്.
നികിത് ഷെട്ടി അയച്ച ഭീഷണി സന്ദേശവുമുൾപ്പെടെ ഷഹബാസ് സോഷ്യൽ മീഡിയയിൽ പങ്കുവയ്ക്കുകയായിരുന്നു. കർണാടക ഡിജിപി, മുഖ്യമന്ത്രി സിദ്ധരാമയ്യ, ഉപമുഖ്യമന്ത്രി ഡികെ ശിവകുമാർ എന്നിവരെയും പോസ്റ്റിൽ ടാഗ് ചെയ്തിരുന്നു. ഇതിനുപിന്നാലെ ‘എറ്റിയോസ് ഡിജിറ്റൽ’ നികിതിനെ ജോലിയിൽ നിന്നും 5 വർഷത്തേക്ക് പിരിച്ചുവിടുന്നതായി അറിയിക്കുകയായിരുന്നു.
ജീവനക്കാരനെ പിരിച്ചുവിട്ടതായും ജോലിസ്ഥലത്തെ സ്ത്രീകളുടെ സുരക്ഷിതത്വം ഉറപ്പാക്കാൻ കൂടുതൽ നടപടികൾ സ്വീകരിക്കുമെന്നും ‘എറ്റിയോസ് ഡിജിറ്റൽ’ ഇൻസ്റ്റഗ്രാം പേജിൽ പങ്കുവച്ച പ്രസ്താവനയിൽ അറിയിച്ചു.
