കണ്ണൂർ അഡീഷണൽ ഡിസ്ട്രിക്ട് മജിസ്ട്രേറ്റ് നവീൻ ബാബു ജീവനൊടുക്കിയ സംഭവത്തിൽ ദുഃഖം രേഖപ്പെടുത്തി പ്രതിപക്ഷ നേതാവ് വി.ഡി സതീശൻ. കൊലപാതകത്തിന് തുല്യമായ സംഭവമാണുണ്ടായതെന്ന് അദ്ദേഹം പറഞ്ഞു. ഞെട്ടലോടെയാണ് മരണവിവരം കേട്ടതെന്നും അത്യന്തം വേദനാജനകമാണെന്നും പ്രതിപക്ഷ നേതാവി മാദ്ധ്യമങ്ങളോട് പറഞ്ഞു.
സിപിഎം കുടുംബത്തിൽപെട്ടയാളാണ് നവീൻ ബാബു. അദ്ദേഹം അഴിമതിക്കാരൻ ആണെന്ന് മറ്റ് സംഘടനകളിൽ പ്രവർ‌ത്തിക്കുന്നയാളുകൾക്ക് പോലും അഭിപ്രായമില്ല. മനഃപൂർവമായി വ്യക്തിവിരോധം തീർക്കാൻ ക്ഷണിക്കപ്പെടാത്തൊരു യാത്രയയപ്പ് സമ്മേളനത്തിലെത്തി ജില്ലാ പ്രസിഡൻ്റ് അപമാനിച്ചതിന്റെ ഫലമായിട്ടാണ് അദ്ദേഹം ഈ കടുംകൈ ചെയ്തതെന്നും അദ്ദേഹം പറഞ്ഞു.
അധികാരം എത്രമാത്രം ദുരുപയോഗപ്പെടുത്താമെന്നും അധികാരസ്ഥാനങ്ങളിൽ ഇരിക്കുന്നവർക്ക് ആരെയും അപമാനിക്കാം എന്നതായി അവസ്ഥ. ഈ ഉദ്യോഗസ്ഥനോട് ചെയ്തത് ഭരണകൂടത്തിന്റെ അഹങ്കാരത്തിന്റെയും ധിക്കാരത്തിന്റെയും പ്രതിഫലനമാണ്. കേസെടുത്ത് അന്വേഷണം നടത്തി കുറ്റവാളിയെ നിയമത്തിന്റെ മുൻപിൽ കൊണ്ടുവരണമെന്നാണ് ആവശ്യപ്പെടുന്നതായും വിഡി സതീശൻ പറഞ്ഞു.
