പത്തനംതിട്ട: ശമ്പളം ജീവനക്കാരുടെ അവകാശമാണെന്നും സമ്മതമില്ലാതെ പിടിച്ചെടുക്കാൻ സർക്കാരിന് അധികാരമില്ലെന്നുമുളള സുപ്രീംകോടതിയുടെ വിധി വന്നിട്ട് ആറ് വർഷം. 2018 ഒക്ടോബർ 29 ലെ ചരിത്രവിധിയുടെ ആറാം വാർഷികം സംസ്ഥാന ജീവനക്കാർ എൻജിഒ സംഘിന്റെ നേതൃത്വത്തിൽ ശമ്പള സംരക്ഷണ ദിനമായി ആചരിച്ചു.
2018 ലെ സാലറി ചലഞ്ചിന്റെ പേരിൽ ജീവനക്കാരുടെ ഒരുമാസത്തെ ശമ്പളം നിർബന്ധപൂർവ്വം പിടിച്ചെടുക്കാനുള്ള ഇടതു സർക്കാർ നീക്കത്തിനെതിരെ ആയിരുന്നു എൻ.ജി.ഒ. സംഘ് നിയമപോരാട്ടം നടത്തിയത്. ഇതിനൊടുവിലായിരുന്നു സുപ്രീംകോടതി വിധി.
പത്തനംതിട്ട മിനി സിവിൽ സ്റ്റേഷനിൽ നടന്ന ശമ്പള സംരക്ഷണ ദിനാചാരണ പരിപാടി കേരള എൻ.ജി.ഒ സംഘ് സംസ്ഥാന ജനറൽ സെക്രട്ടറി എസ്. രാജേഷ് ഉത്ഘാടനം ചെയ്തു. സംസ്ഥാന വനിതാ കൺവീനർ പി.സി. സിന്ധുമോൾ ശമ്പള സംരക്ഷണ പ്രതിജ്ഞ ചൊല്ലിക്കൊടുത്തു.
ജില്ലാ പ്രസിഡന്റ് എൻ.ജി. ഹരീന്ദ്രൻ അധ്യക്ഷത വഹിച്ചു. സംസ്ഥാന സമിതി അംഗങ്ങളായ എസ്. ഗിരീഷ്, ജി. അനീഷ്, ജില്ലാ സെക്രട്ടറി എം. രാജേഷ്, ട്രഷറർ പി. ആർ. രമേശ് എന്നിവർ പ്രസംഗിച്ചു.
