വയനാട്: വയനാടിന്റെ പ്രശ്നങ്ങളെ കുറിച്ച് രാഹുലിനെ പോലെ പ്രിയങ്കയ്ക്കും യാതൊരു ധാരണയുമില്ലെന്ന് മുൻ കേന്ദ്രമന്ത്രിയും ബിജെപി നേതാവുമായ രാജീവ് ചന്ദ്രശേഖർ. രാഹുലിന് ഒന്നും അറിയില്ലെന്ന് ഇതിനകം എല്ലാവർക്കും മനസ്സിലായി. ഇതേ അവസ്ഥ തന്നെയാണ് പ്രിയങ്കയ്ക്കുമുള്ളത്. ഏട്ടനും പെങ്ങൾക്കും ജനങ്ങളുടെ പ്രശ്നം മനസിലാക്കാൻ പോലും താത്പര്യമില്ലെന്നും അദ്ദേഹം ചൂണ്ടിക്കാട്ടി. എൻഡിഎ സ്ഥാനാർത്ഥി നവ്യ ഹരിദാസിന്റെ തെരഞ്ഞെടുപ്പ് പ്രചാരണത്തിന് എത്തിയതായിരുന്നു അദ്ദേഹം.
ഏട്ടൻ വന്നു അതെ പോലെ ഓടിപ്പോയി. പിന്നാലെ അനിയത്തി വരുന്നു. എന്താണ് ഇവിടെ ചെയ്യേണ്ടതെന്ന് പോലും അറിയാതെ പ്രിയങ്കരി ചമഞ്ഞ് നടക്കുകയാണ്. ദുരന്തമുഖത്ത് വെറുതെ നിൽക്കുന്ന രാഹുലിനോ പോലുള്ള എംപിയെ ഇനി വയനാടിന് ആവശ്യമില്ല. ഒരു ടൂറിസ്റ്റ് എംപിയെ കൂടി ഇനി വയനാടുകാർ സഹിക്കില്ല. വാഗ്ദാനം കൊടുത്ത് ഓടിപ്പോകുന്നവരെ ഇനി വയനാടിന് വേണ്ടെന്നും അദ്ദേഹം പറഞ്ഞു.
നവ്യ ഹരിദാസ് മണ്ഡലത്തിന് പറ്റിയ സ്ഥാനാർത്ഥിയാണ്. സാധാരണ കുടുംബത്തിൽ നിന്നും ജനിച്ച് കഠിനാദ്ധ്വാനം കൊണ്ട് ഐടി മേഖലയിൽ ഉയർന്ന ജോലിയിൽ എത്തി. അത് ഉപേക്ഷിച്ചാണ് ജനസേവനത്തിന് നവ്യ ഹരിദാസ് എത്തിയത്. ഇതാണ് സ്ഥാർത്ഥികൾ തമ്മിലുള്ള വ്യത്യാസമെന്നും അദ്ദേഹം ചൂണ്ടിക്കാട്ടി.
