ഹൈദരാബാദ്: വ്യാജ വാട്ട്സ്ആപ്പ് ഗ്രൂപ്പിൽ ചേർന്ന മധ്യവയസ്കനെ പറ്റിച്ച് ലക്ഷങ്ങൾ കൈക്കലാക്കി സൈബർ തട്ടിപ്പ് സംഘം. സ്റ്റോക്ക് മാർക്കറ്റിലെ നിക്ഷേപങ്ങളെക്കുറിച്ച് പഠിക്കാൻ വാട്ട്സ് ആപ്പ് ഗ്രൂപ്പിൽ ചേർന്ന ഹൈദരാബാദ് സ്വദേശിയായ 63 63കാരനാണ് 50 ലക്ഷം രൂപ നഷ്ടമായത്. നിക്ഷേപങ്ങൾക്ക് ഇരട്ടി ലാഭം വാഗ്‌ദാനം ചെയ്താണ് തട്ടിപ്പ്.
ഇരയായ മധ്യവയസ്‌കൻ സ്റ്റോക്ക് ഡിസ്‌കഷൻ ഗ്രൂപ്പ് എന്ന വാട്ട്സ് ആപ്പ് ഗ്രൂപ്പിൽ ചേർന്നതോടെയാണ് തട്ടിപ്പിന്റെ തുടക്കം. പ്രശസ്ത സാമ്പത്തിക ഉപദേഷ്ടാവെന്ന് സ്വയം പരിചയപ്പെടുത്തിയ കുണാൽ സിംഗായിരുന്നു ഗ്രൂപ്പിന്റെ അഡ്മിനിസ്ട്രേറ്റർ. സ്റ്റോക്കുകളിൽ നിന്ന് 500 ശതമാനം വരെ ഉയർന്ന വരുമാനം നേടാമെന്ന് ഇയാൾ 63 കാരനെ വിശ്വസിപ്പിച്ചു. ഇയാൾ നിർദ്ദേശിച്ച പ്രകാരം മധ്യവയസ്‌കൻ സ്റ്റോക്ക് ട്രേഡിംഗ് പഠിക്കാനായി ചില ഓൺലൈൻ ക്ലാസുകളിൽ ചേർന്നു.
ഈ സെഷനുകളിൽ സ്‌കൈറിം ക്യാപിറ്റൽ എന്ന പ്ലാറ്റ്‌ഫോമിലൂടെ നിക്ഷേപങ്ങൾ നടത്താൻ തട്ടിപ്പുകാർ ഇരയോടും മറ്റുള്ളവരോടും നിർദ്ദേശിച്ചു. തുടക്കത്തിൽ ചെറിയ തുകകകൾ നിക്ഷേപിച്ച 63 കാരനെ വലിയ ലാഭം ലഭിച്ചുവെന്ന് തട്ടിപ്പുകാർ വിശ്വസിപ്പിച്ചു. ഇരയുടെ വിശ്വാസം നേടിയെടുത്ത ഇവർ ഇതിലേക്ക് 50 ലക്ഷം രൂപ നിക്ഷേപിക്കാൻ പ്രേരിപ്പിക്കുകയായിരുന്നു. ഇതുപ്രകാരം മധ്യവയസ്‌കൻ പണം നിക്ഷേപിച്ചെങ്കിലും ലാഭം പിൻവലിക്കാനായില്ല. തുടർന്നാണ് തട്ടിപ്പിന് ഇരയായെന്ന് തിരിച്ചറിയുന്നത്.
