കൊച്ചി: ലക്ഷദ്വീപിൽ 4 ജി നെറ്റ്‌വർക്ക് അവതരിപ്പിച്ച് മുൻനിര മൊബൈൽ നെറ്റ്‌വർക്കായ വി (വോഡഫോൺ ഐഡിയ). ഈ ചുവടുവയ്പ് ലക്ഷദ്വീപ് നിവാസികൾക്കും വിനോദസഞ്ചാരികൾക്കും ബിസിനസുകാർക്കും പ്രയോജനകരമാകുമെന്ന് വി വാർത്താക്കുറിപ്പിൽ അറിയിച്ചു.
ദേശീയ തലത്തിൽ വി നടത്തുന്ന വിപുലീകരണങ്ങളുടെ ഭാഗമായാണ് മൂന്ന് ബാൻഡ് സ്‌പെക്ട്രത്തിലുള്ള വി ജിഗാനെറ്റ് അവതരിപ്പിച്ചത്. ലക്ഷദ്വീപിലെ അഗത്തിയിലും കവരത്തിയിലും 20,000 ത്തിലേറെ വരുന്ന ജനങ്ങളേയും സന്ദർശകരേയും കണക്ടഡ് ആക്കാൻ 900 മെഗാഹെർട്‌സ് സ്‌പ്രെക്ട്രവും 1800 മെഗാഹെർട്‌സ്, 2100 മെഗാഹെർട്‌സ് സ്‌പെക്ട്രവുമാണ് വിന്യസിച്ചിരിക്കുന്നതെന്ന് കമ്പനി വ്യക്തമാക്കി.
ഇന്ത്യയുടെ വിദൂര മേഖലകളിൽ 4 ജി സേവനം ലഭ്യമാക്കാനുള്ള നീക്കങ്ങളിലെ ഒരു സുപ്രധാന ചുവടുവെപ്പാണിതെന്ന് വോഡഫോൺ ഐഡിയ കേരള, തമിഴ്‌നാട് ക്ലസ്റ്റർ ബിസിനസ് മേധാവി ആർ എസ് ശാന്താറാം പറഞ്ഞു. ആശയവിനിമയം മെച്ചപ്പെടുത്തുക മാത്രമല്ല പുതിയ വിദ്യാഭ്യാസ, ബിസിനസ്, വളർച്ചാ അവസരങ്ങളും തുറന്നുകൊടുക്കുക കൂടി ചെയ്യുമെന്ന് അദ്ദേഹം കൂട്ടിച്ചേർത്തു. വീഡിയോ സ്ട്രീമിങ്, അതിവേഗത ഡൗൺലോഡിങ്, തടസങ്ങളില്ലാത്ത ഓൺലൈൻ ഗെയിമിങ് തുടങ്ങിയവയ്‌ക്കും 4 ജി സേവനം സഹായകമാകും.
ഏപ്രിലിലെ വിജയകരമായ എഫ്പിഒയ്‌ക്ക് ശേഷം പുതിയ മേഖലകളിലേക്ക് ശേഷി വിപുലീകരിക്കുകയും നിലവിലെ ശൃംഖല കൂടുതൽ മെച്ചപ്പെടുത്തി ഉപഭോക്താക്കളുടെ അനുഭവങ്ങൾ മികച്ചതാക്കുകയും ചെയ്യുന്ന നീക്കങ്ങളാണ് വി നടത്തി വരുന്നത്.
