ന്യൂഡൽഹി: രാജ്യത്ത് ഇതുവരെ 62,201 4ജി ടവറുകൾ സ്ഥാപിച്ചതായി കേന്ദ്ര ടെലികോം മന്ത്രാലയം. എന്നാൽ ഇവ മൊത്തമായി കമ്മീഷൻ ചെയ്തിട്ടില്ലെന്നും ടോലികോം മന്ത്രി ജ്യോതിരാദിത്യ സിൻഹ പറഞ്ഞു. ഒരു ലക്ഷം ടവറുകൾ സജ്ജമാക്കുകയാണ് ലക്ഷ്യമെന്നും വൈകാതെ തന്നെ ഇത് യാഥാർത്ഥ്യമാകുമെന്നും അദ്ദേഹം പറഞ്ഞു.
ടാറ്റയുമായി സഹകരിച്ചാണ് ബിഎസ്എൻഎൽ രാജ്യവ്യാപകമായി 4ജി ടവറുകൾ സ്ഥാപിക്കുന്നത്. . 700 MHz, 2100 MHz ബാൻഡുകളിലാണ് ബിഎസ്എൻഎല്ലിന്റെ 4ജി നെറ്റ്‌വർക്ക് പ്രവർത്തിക്കുന്നത്. തങ്ങളുടെ നെറ്റ്‌വർക്ക് മറ്റ് ടെലികോം കമ്പനികളുടെ നെറ്റ്‌വർക്കിന് തുല്യമായ വേഗതയാണ് നൽകുന്നതെന്ന് ബിഎസ്എൻഎൽ അവകാശപ്പെട്ടു.
ഇതിനിടയിൽ ബിഎസ്എൻഎൽ വരിക്കാരുടെ എണ്ണത്തിലും വൻ വർദ്ധനയാണ് രേഖപ്പെടുത്തുന്നത്. ചെലവ് കുറഞ്ഞ പ്ലാനുകളും ആനുകൂല്യങ്ങളുമാണ് വരിക്കാരെ ആകർഷിക്കുന്നത്. ജൂലൈ മുതൽ ഒക്ടോബർ വരെ 55 ലക്ഷം പേരാണ് പോർട്ടിംഗ് വഴി ബിഎസ്എൻഎല്ലിലേക്ക് എത്തിയത്.
