തിരുവനന്തപുരം: വിഴിഞ്ഞം അന്തരാഷ്‌ട്ര തുറമുഖത്തിന് പുതിയ ലൊക്കേഷൻ കോഡ് ലഭിച്ചതായി തുറമുഖവകുപ്പ് മന്ത്രി വി എൻ വാസവൻ അറിയിച്ചു. ഇന്ത്യയുടേയും തിരുവനന്തപുരം ജില്ലയുടെയും ചുരുക്കെഴുതുകൾ കോഡിൽ ഉണ്ട്. ‘IN TRV 01’ എന്നതാണ് വിഴിഞ്ഞം തുറമുഖത്തിന്റെ പുതിയ ലൊക്കേഷൻ കോഡ്. ആദ്യം ലഭിച്ചിരുന്നത് ഇന്ത്യയുടേയും നെയ്യാറ്റിൻകരയുടെയും ചുരുക്കെഴുത്ത് ഉൾപ്പെട്ട ‘IN NYY 1’ എന്നതായിരുന്നു.
രാജ്യാന്തര വിമാനത്താവളം ഉൾപ്പെടെ തിരുവനന്തപുരത്തിന്റെ ലൊക്കേഷൻ കോഡ് TRV എന്നതാണ്. എന്നാൽ അംഗരാജ്യങ്ങൾ തമ്മിലുള്ള സാമ്പത്തിക സഹകരണവും ഏകീകരണവും പ്രോത്സാഹിപ്പിക്കുന്ന ഐക്യരാഷ്‌ട്രസഭയുടെ അഞ്ച് പ്രാദേശിക കമ്മീഷനുകളിൽ ഒന്നായ യുണൈറ്റഡ് നേഷൻസ് എക്കണോമിക് കമ്മീഷൻ ഫോർ യൂറോപ്പ് (UNECE) ഏകീകൃത കോഡ് വേണം എന്ന നിർദ്ദേശം നൽകിയിരുന്നു.
അന്താരാഷ്‌ട്ര തലത്തിൽ പ്രവർത്തിക്കുന്നതിനാൽ ഈ മാറ്റത്തിനായി വിഴിഞ്ഞം പോർട്ട് അപേക്ഷ നൽകിയിരുന്നു. കേന്ദ്രസർക്കാർ ഏജൻസിയായ ഡയറക്ട്രേറ്റ് ജനറല്‍ ഓഫ് സിസ്റ്റം ആന്റ് ഡാറ്റാ മാനേജ്‌മെന്റാണ് ലൊക്കേഷൻ കോഡ് അനുവദിക്കുന്നത്. പുതിയ കോഡിന് യൂനിസ് അംഗീകാരം നൽകിയതായും ഇനിമുതൽ IN TRV 01 എന്ന ലോക്കേഷൻ കൊണ്ടായിരിക്കും ഷിപ്പിംഗിനുൾപ്പെടെ ഉപയോഗിക്കുകയെന്നും മന്ത്രി അറിയിച്ചു.
