ന്യൂഡൽഹി: പുതുവർഷത്തിലേക്ക് പ്രതീക്ഷയോടെ ഇന്ത്യൻ തൊഴിൽ വിപണി (ജോബ് മാർക്കറ്റ്). 2025 ൽ രാജ്യത്തെ ഐടി, റീട്ടെയിൽ, ടെലികമ്മ്യൂണിക്കേഷൻസ്, ബാങ്കിംഗ്, ഫിനാൻഷ്യൽ സർവീസ്, ഇൻഷുറൻസ് മേഖലകളിലെ നിയമനങ്ങളിൽ 9 ശതമാനം അധിക മുന്നേറ്റമുണ്ടാകുമെന്നാണ് റിപ്പോർട്ട്.
ജോബ്സ് ആൻഡ് ടാലന്റ് പ്ലാറ്റ്ഫോം, ഫൗണ്ടിറ്റ് എന്നിവയിൽ നിന്നുള്ള വിവരങ്ങൾ ക്രോഡീകരിച്ചാണ് റിപ്പോർട്ട് തയ്യാറാക്കിയത്. ഐടി, റീട്ടെയിൽ, ടെലികമ്മ്യൂണിക്കേഷൻസ്, മേഖലകളിൽ രാജ്യത്തെ നിയമനങ്ങളിൽ ഒൻപത് ശതമാനം വളർച്ചയുണ്ടാകുമെന്ന് റിപ്പോർട്ട് വ്യക്തമാക്കുന്നു.
2024 ൽ 10 ശതമാനം വളർച്ചയാണ് ഈ മേഖലയിൽ ഉണ്ടായത്. രാജ്യത്തെ വളർന്ന് വരുന്ന സാങ്കേതിക വിദ്യയുടേയും മറ്റ് ബിസിനസ് ഘടകങ്ങളുടേയും സഹായത്താൽ 2025 ആകുമ്പോഴേക്കും തൊഴിൽ വിപണയിൽ വലിയ മുന്നേറ്റമുണ്ടാകുമെന്ന് വിദഗ്ധർ പറയുന്നു. എഡ്ജ് കമ്പ്യൂട്ടിങ്, ക്വാണ്ടം ആപ്ലിക്കേഷൻ, സൈബർ സുരക്ഷ എന്നിവയിൽ നേടിയ മുന്നേറ്റം ആരോഗ്യ സംരക്ഷണ മേഖലയിലേയും ഐടി വ്യവസായങ്ങളിലും മാറ്റങ്ങൾ നൽകുമെന്നും റിപ്പോർട്ട് പറയുന്നു. 2023നെ അപേക്ഷിച്ച് 2024ൽ രാജ്യത്തെ നഗര-ഗ്രാമ മേഖലകളിൽ തൊഴിൽ വിപണി ശക്തമായ മുന്നേറ്റം നടത്തിയതായും ഇത് വ്യക്തമാക്കുന്നു.
2023 ജനുവരി മുതൽ 2024 നവംബർ വരെയുള്ള സമയത്തെ ഫൗണ്ടറ്റ് ഇൻസൈറ്റ്‌സ് ട്രാക്കറിൽ നിന്നുള്ള വിവരങ്ങളെ അടിസ്ഥാനമാക്കിയാണ് ഈ റിപ്പോർട്ട് തയ്യാറാക്കുന്നത്. 2025ലേക്ക് കടക്കുമ്പോൾ ഇന്ത്യയിലെ തൊഴിൽ വിപണിയിൽ സാധ്യതകൾ ഏറുമെന്നും, 9 ശതമാനം വളർച്ച പ്രതീക്ഷിക്കുന്നതായും ഫൗണ്ടിറ്റ് വൈസ് പ്രസിഡന്റ് അനുപമ ഭീരാജ്ക പറയുന്നു.
റീട്ടെയിൽ മീഡിയ നെറ്റ്വർക്കുകൾ, ആർട്ടിഫിഷൽ ഇന്റലിജൻസ്, ഇ കൊമേഴ്‌സ്, എച്ച്ആർ, ഡിജിറ്റൽ സേവനങ്ങൾ തുടങ്ങി എല്ലാ മേഖലകളിലും കൂടുതൽ തൊഴിൽ സാദ്ധ്യതയേറും. ഇതോടെ കമ്പനികൾ ഒരു നിശ്ചിത മേഖലയ്‌ക്കുള്ളിൽ നിന്ന് മാത്രം ആളുകളെ തെരഞ്ഞെടുക്കുന്ന പതിവ് രീതിയ്‌ക്ക് മാറ്റംവരുമെന്നും ഇവർ പറയുന്നു.
