സ്വകാര്യ വാഹനങ്ങൾ വാടകയ്‌ക്ക് വാങ്ങി ഉപയോഗിക്കുന്നവർക്കും നൽകുന്നവർക്കും മോട്ടോർ വാഹന വകുപ്പിന്റെ മുന്നറിയിപ്പ്. കളർക്കോട് അപകടത്തിൽ മെഡിക്കൽ വിദ്യാർത്ഥികൾ മരിച്ചതിന് പിന്നാലെ ഇതുമായി ബന്ധപ്പെട്ട് നിരവധി പരാതികൾ ഉയർന്നിരുന്നു. കൂടാതെ ഗതാഗത കമ്മിഷണർ സി.എച്ച്. നാഗരാജുവിന്റെ പ്രസ്താവനകളും പൊതുജനങ്ങൾക്കിടയിൽ ആശയക്കുഴപ്പം സൃഷ്ടിച്ചിരുന്നു. ഇത് പിന്നാലെയാണ് ഇത് സംബന്ധിച്ച് മോട്ടർ വാഹന വകുപ്പ് കൂടുതൽ വ്യക്തത വരുത്തിയത്. സ്വകാര്യ വാഹനങ്ങളുടെ ദുരുപയോഗം തെളിഞ്ഞാൽ വാഹനങ്ങളുടെ രജിസ്ട്രേഷൻ റദ്ദ് ചെയ്യുന്നതുൾപ്പെടെ ഉടമയ്‌ക്ക് എതിരെ കർശന നടപടി സ്വീകരിക്കുമെന്ന് സി.എച്ച്. നാഗരാജു മുന്നറിയിപ്പ് നൽകി.
- സ്വകാര്യ വാഹനങ്ങൾ മറ്റുള്ള വ്യക്തികളുടെ ഉപയോഗത്തിലേക്ക് പണമോ പ്രതിഫലമോ വാങ്ങി നൽകുന്നത് മോട്ടോർ വാഹന നിയമപ്രകാരം ശിക്ഷാർഥമാണ്. അനധികൃതമായി വാടകയ്‌ക്ക് നൽകുന്ന സ്വകാര്യ വാഹനങ്ങളുടെ രജിസ്ട്രേഷൻ റദ്ദ് ചെയ്യുന്നത് ഉൾപ്പെടെയുള്ള നടപടികൾ മോട്ടോർ വാഹന വകുപ്പ് സ്വീകരിക്കും.
- വാഹന ഉടമയുടെ കുടുംബാംഗങ്ങൾ വാഹനം സ്ഥിരമായി ഉപയോഗിക്കുന്നത് നിയമവിരുദ്ധമല്ല. അതുപോലെ ബന്ധുക്കൾക്കോ സുഹൃത്തുക്കൾക്കോ അത്യാവശ്യഘട്ടങ്ങളിൽ പ്രതിഫലം കൂടാതെ വാഹനം ഉപയോഗിക്കാൻ നൽകുന്നതിലും തെറ്റില്ല.
- എന്നാൽ സ്വകാര്യ വാഹനങ്ങൾ സ്ഥിരമായി മറ്റു വ്യക്തികളുടെ ഉപയോഗത്തിനായി വിട്ടു നൽകുന്നതും പല വ്യക്തികളെ സ്ഥിരമായി വിമാനത്താവളങ്ങൾ, റെയിൽവേ സ്റ്റേഷൻ, വിനോദസഞ്ചാര കേന്ദ്രങ്ങൾ എന്നിവിടങ്ങിൽ നിന്നും കൊണ്ടുവരികയോ കൊണ്ടുപോകുകയോ ചെയ്യുന്നതും നിയമവിരുദ്ധമാണ്. ഇത് സംബന്ധിച്ച സോഷ്യൽ മീഡിയയിലടക്കം പരസ്യം നൽകുന്നതും മോട്ടോർ വാഹന നിയമപ്രകാരം ശിക്ഷാർഹമാണ്.
- സ്വകാര്യ വാഹനങ്ങളിൽ എട്ടു സീറ്റിൽ കൂടുതലുള്ള വാഹനങ്ങൾ വാഹന ഉടമയുടെയും കുടുംബാംഗങ്ങളുടെയും ഉപയോഗത്തിന് വേണ്ടി മാത്രമുള്ളതാണ്. വാഹന ഉടമയുടെ സത്യവാങ്മൂലത്തിന്റെ അടിസ്ഥാനത്തിലാണ് ഇവ സ്വകാര്യവാഹനമായി രജിസ്റ്റർ ചെയ്ത് നൽകിയിട്ടുള്ളത്. ഇത്തരം വാഹനങ്ങൾ എന്തു നിലയ്‌ക്കായാലും മറ്റുള്ളവരുടെ ഉപയോഗത്തിന് വിട്ടുനൽകാൻ നിയമം അനുവദിക്കുന്നില്ല.
- സ്വകാര്യ വാഹനങ്ങൾ റെന്റ് കാർ എന്ന നിലയിൽ വാടകയ്‌ക്ക് നൽകാൻ നിയമം അനുവദിക്കുന്നില്ല. എന്നാൽ മോട്ടോർ വാഹന നിയമപ്രകാരം ‘റെന്റ് ക്യാബ്’ എന്ന നിയമാനുസൃത സംവിധാനം വഴി വാഹനങ്ങൾ വാടകയ്‌ക്ക് നൽകാൻ അനുമതിയുണ്ട്. ഇത്തരത്തിൽ വാഹനങ്ങൾ വാടകയ്‌ക്ക് നൽകുന്നതിനായി ലൈസൻസിന് അപേക്ഷിക്കുന്ന വ്യക്തികൾക്കോ സ്ഥാപനങ്ങൾക്കും 50ൽ കുറയാത്ത ഓൾ ഇന്ത്യ ടൂറിസ്റ്റ് പെർമിറ്റ് ഉള്ള വാഹനങ്ങളും മറ്റ് അനുബന്ധ സൗകര്യങ്ങളും ആവശ്യമാണ്.
- അതുപോലെ മോട്ടോർസൈക്കിൾ വാടകയ്‌ക്ക് നൽകുന്നതിനായി ‘റെന്റ് മോട്ടോർ ബൈക്ക് ലൈസൻസും’ നിയമപ്രകാരം ലഭ്യമാണ്. ലൈസൻസിന് അപേക്ഷിക്കുന്നതിനായി ചുരുങ്ങിയത് അഞ്ചു മോട്ടോർസൈക്കിളുകൾ ട്രാൻസ്പോർട്ട് വാഹനമായി രജിസ്റ്റർ ചെയ്തിരിക്കണം എന്നാണ് വ്യവസ്ഥ. ഇത്തരം വാഹനങ്ങളിൽ കറുത്ത പ്രതലത്തിൽ മഞ്ഞനിറത്തിലുള്ള അക്ഷരങ്ങളിലാണ് രജിസ്ട്രേഷൻ നമ്പർ പ്രദർശിപ്പിക്കേണ്ടത്. റെന്റ് ക്യാബിൽ ഉൾപ്പെട്ട ഇലക്ട്രിക് വാഹനങ്ങളുടെ രജിസ്ട്രേഷൻ പച്ച പ്രതലത്തിൽ കറുത്ത അക്ഷരം കൊണ്ടായിരിക്കണം.
- റെന്റ് കാർ നിയമപ്രകാരം വാടകയ്‌ക്ക് നൽകുന്ന വാഹനങ്ങൾക്ക് വാഹനത്തിന്റെ ക്ഷമത ഉറപ്പുവരുത്തുന്നതിനായി ഫിറ്റ്നസ് സർട്ടിഫിക്കറ്റ്, പെർമിറ്റ്, വാടകയ്‌ക്ക് വാഹനം ഉപയോഗിക്കുന്നവരുടെ സംരക്ഷണത്തിന് കൂടി കവർ ചെയ്ത ഇൻഷുറൻസ് എന്നിവ ഉണ്ടായിരിക്കണം. ഇപ്രകാരം യാന്ത്രിക ക്ഷമത പരിശോധിച്ചു ഉറപ്പാക്കിയ വാഹനമാണ് പൊതുജനങ്ങളുടെ ഉപയോഗത്തിനായി വാടകയ്‌ക്ക് നൽകാൻ അനുവദിക്കപ്പെട്ടിട്ടുള്ളത്. ജനങ്ങളുടെ സുരക്ഷയെയും സംരക്ഷണത്തെയും കരുതിയാണ് ഇത്തരം നിയമം വ്യവസ്ഥ ചെയ്യുന്നത്.
- സ്വകാര്യ വാഹനങ്ങൾ അനധികൃതമായി വാടകയ്‌ക്ക് കൊടുക്കുന്നത് സംബന്ധിച്ച് ധാരാളം പരാതികൾ ലഭിക്കുന്നുണ്ട്. പരാതിയിൽ ഉൾപ്പെട്ടിരിക്കുന്ന വാഹനങ്ങളിൽ അന്വേഷിച്ചു ദുരുപയോഗം തെളിഞ്ഞാൽ ഭക്ഷണം നടപടികൾ വാഹന ഉടമയ്‌ക്കെതിരെ സ്വീകരിക്കുന്നതാണ്. അനധികൃതമായി വാടകയ്‌ക്ക് നൽകുന്ന സ്വകാര്യ വാഹനങ്ങളുടെ രജിസ്ട്രേഷൻ ഉൾപ്പെടെയുള്ള നിയമനടപടികൾ വിധേയമാക്കാൻ മോട്ടോർ വാഹന നിയമം വ്യവസ്ഥ ചെയ്യുന്നു എന്നും ട്രാൻസ്പോർട്ട് കമ്മീഷണർ അറിയിച്ചു
