തിരുവനന്തപുരം: ലോക മാരി ടൈം ഭൂപടത്തിൽ പുതിയ മുദ്രകൾ ചാർത്തി വിഴിഞ്ഞം അന്താരാഷ്‌ട്ര തുറമുഖം വളരുന്നു. ഇതുവരെ വിഴിഞ്ഞം വഴി നടത്തിയ കണ്ടെയ്‌നർ നീക്കം രണ്ടുലക്ഷം കടന്നു. 102 കപ്പലുകള്‍ ഇത് വരെ വിഴിഞ്ഞത്ത് എത്തി. നിലവിൽ ഏഴു കപ്പലുകൾ വിവിധ തുറമുഖങ്ങളിൽനിന്നായി വിഴിഞ്ഞത്തേക്ക് പുറപ്പെട്ടിട്ടുണ്ട്‌.
100–-ാമത്തെ കപ്പൽ ക്രിസ്‌മസ്‌ദിനത്തിലാണ് അടുത്തത് എന്ന പ്രത്യേകതയുണ്ട് .നൂറാമത്തെ കപ്പലിനെ വിഴിഞ്ഞം ഇന്റർനാഷണൽ സീപോർട്ട്‌ ലിമിറ്റഡ്‌ (വിസിൽ) എംഡി ദിവ്യ എസ്‌ അയ്യരുടെ നേതൃത്വത്തിലാണ്‌ സ്വീകരിച്ചത്‌.22 ദിവസത്തിനകം 30 കപ്പലാണ് എത്തിയത്.
വിഴിഞ്ഞത്ത് ട്രയൽ റൺ തുടങ്ങിയത് ജൂലൈ 11 ന്‌ ആയിരുന്നു. ഡിസംബർ മൂന്ന്‌ മുതൽ തുറമുഖം വാണിജ്യാടിസ്ഥാനത്തിലാണ് പ്രവർത്തിക്കുന്നത്. അടുത്ത മാസം കൊമേഴ്‌സ്യൽ ഓപ്പറേഷന്‍ ഉദ്‌ഘാടനം ചെയ്യും.
രണ്ടാഴ്‌ച മുമ്പാണ് വിഴിഞ്ഞം തുറമുഖത്തിന്‌ പുതിയ ലോക്കേഷൻ കോഡ് ലഭിച്ചത് . ഇന്ത്യയുടെയും തിരുവനന്തപുരം ജില്ലയുടെയും ചുരുക്കെഴുത്ത് ചേർത്ത് IN TRV 01 എന്നതാണ് വിഴിഞ്ഞത്തിന്റെ ലൊക്കേഷൻ കോഡ്. ഇന്ത്യയുടെയും നെയ്യാറ്റിൻകരയുടെയും ചുരുക്കെഴുത്ത് ചേർത്ത് IN NYY 1 എന്നതായിരുന്നു ആദ്യം ലഭിച്ച ലൊക്കേഷൻ കോഡ്.
