തിരുവനന്തപുരം: സംസ്ഥാനത്ത് പുതുക്കിയ വോട്ടർ പട്ടിക പ്രസിദ്ധീകരിച്ചു. 2,78,10,942 വോട്ടർമാരാണ് പട്ടികയിലുള്ളത്. സ്ത്രീ വോട്ടർമാരാണ് കൂടുതൽ. സംസ്ഥാനത്ത് ആകെ 1,43,69,092 സ്ത്രീ വോട്ടർമാരാണുള്ളത്. പുരുഷ വോട്ടർമാർ 1,34,41,490. 63,564 പുതിയ വോട്ടർമാരും പട്ടികയിൽ ഇടം പിടിച്ചതായി മുഖ്യ തെരഞ്ഞെടുപ്പ് ഓഫീസർ രത്തൻ ഖേൽക്കർ വ്യക്തമാക്കി.
മൂന്ന് ലക്ഷത്തോളം യുവ വോട്ടർമാണ് പട്ടികയിലുള്ളത്. മലപ്പുറത്താണ് കൂടുതൽ വോട്ടർമാരുള്ളത് (34,01,577). കുറവ് വയനാട്ടിൽ (6,42,200). 2025 ജനുവരി ഒന്ന് യോഗ്യത തീയതിയായുള്ള വോട്ടർ പട്ടികയാണ് പ്രസിദ്ധീകരിച്ചത്. വോട്ടർ പട്ടിക ശുദ്ധീകരണ പ്രക്രിയയുടെ ഭാഗമായി 89,907 വോട്ടർമാരെ പട്ടികയിൽനിന്ന് ഒഴിവാക്കി. 25,409 പോളിംഗ് സ്‌റ്റേഷനുകളാണ് സംസ്ഥാനത്ത് ആകെയുള്ളത്. 232 പുതിയ പോളിംഗ് സ്റ്റേഷനുകൾ കൂടി കൂട്ടിച്ചേർത്തു.
