തൃശൂർ: പീച്ചി ഡാം റിസർവോയറിൽ വീണ് അപകടത്തിൽപെട്ട നാല് പെൺകുട്ടികളിൽ ഒരാൾ കൂടി മരിച്ചു. പട്ടിക്കാട് സ്വദേശിയായ 16 വയസുകാരി ആൻഗ്രേയ്സ് ആണ് മരിച്ചത്. തൃശൂർ സെൻ്റ് ക്ലയേഴ്സ് സ്കൂളിലെ പ്ലസ് വൺ വിദ്യാർഥിനിയാണ് ആൻഗ്രേയ്സ്.
ഇന്നലെ അർധരാത്രി പട്ടിക്കാട് സ്വദേശി അലീന ഷാജൻ (16) മരിച്ചിരുന്നു. വെളുപ്പിന് 12.37-ന് മരണം സ്ഥിരീകരിച്ചതായി ആശുപത്രി അധികൃതർ വ്യക്തമാക്കിയിരുന്നു.
പള്ളിപ്പെരുന്നാൾ ആഘോഷത്തിന് കൂട്ടുകാരിയുടെ വീട്ടിലെത്തിയ പെൺകുട്ടികൾ റിസർവോയർ കാണാൻ പോയതായിരുന്നു. ചെരിഞ്ഞുനിന്ന പാറയിൽ കാൽവഴുതി രണ്ട് പേർ വീണതോടെ ഇവരെ രക്ഷിക്കാനുള്ള ശ്രമത്തിനിടയിൽ മറ്റ് രണ്ടുപേരും കയത്തിൽപെടുകയായിരുന്നു.
ഇന്നലെ വൈകിട്ട് മൂന്നരയോടെയാണ് അപകടമുണ്ടായത്. നാല് പേരും റിസർവോയറില്‍ വീഴുകയായിരുന്നു. ഇവർ ഇറങ്ങിയ ഭാഗത്ത് കയമുണ്ടായിരുന്നു. അതിൽ അകപ്പെട്ടതാണ് അപകടത്തിന് കാരണമായതെന്ന് പ്രദേശവാസികൾ പറയുന്നു.
