ആസിഫ് അലി ചേർത്തുപിടിച്ച് ആശ്വസിപ്പിച്ചപ്പോൾ പറഞ്ഞറിയിക്കാനാവാത്തത്ര സന്തോഷം തോന്നിയെന്ന് സുലേഖ. രേഖാചിത്രം പുറത്തെത്തിയതിന് പിന്നാലെ സമൂഹമാദ്ധ്യമങ്ങളിൽ ഏറെ വൈറലായ വ്യക്തിയാണ് സുലേഖ. രേഖാചിത്രത്തിൽ സുലേഖ അഭിനയിച്ചിരുന്നെങ്കിലും എഡിറ്റിംഗിനിടെ ആ സീൻ കട്ട് ചെയ്തിരുന്നു.
സിനിമ കാണാൻ കുടുംബത്തോടൊപ്പം തിയേറ്ററിലെത്തിയ സുലേഖ ചിത്രത്തിൽ താനില്ലെന്ന് അറിഞ്ഞതോടെ ഏറെ സങ്കടത്തിലായി. ഇത് ശ്രദ്ധയിൽപെട്ട ആസിഫ് അലി സുലേഖയെ ചേർത്തുപിടിച്ച് ആശ്വസിപ്പിച്ചിരുന്നു. ഇതിന്റെ വീഡിയോയാണ് സമൂഹമാദ്ധ്യമലോകം ഏറ്റെടുത്തത്. അടുത്ത സിനിമ നമുക്ക് ഒന്നിച്ച് ചെയ്യാമെന്നാണ് സുലേഖയെ ആശ്വസിപ്പിച്ചുകൊണ്ട് ആസിഫ് അലി പറഞ്ഞത്. മാത്രമല്ല, സുലേഖ അഭിനയിച്ച സീൻ അണിയറപ്രവർത്തകർ പുറത്തുവിടുകയും ചെയ്തിരുന്നു. ആസിഫ് അലി ആശ്വസിപ്പിച്ചതിൽ സന്തോഷം പങ്കുവക്കുകയാണ് സുലേഖ.
“ഒരുപാട് പേർ സിനിമ കാണാൻ എന്റെയൊപ്പം വന്നിരുന്നു. പിന്നെ കുറച്ച് പേർ ഉച്ചയ്‌ക്ക് ശേഷം ടിക്കറ്റ് ബുക്ക് ചെയ്തിരുന്നു. പക്ഷേ, സിനിമയിൽ ഇല്ലെന്ന് അറിഞ്ഞതോടെ പലരും എന്നെ വിളിക്കാൻ തുടങ്ങി. സിനിമ കഴിഞ്ഞപ്പോൾ സങ്കടം സഹിക്കാനാവാതെ ഞാൻ കരഞ്ഞുപോയി. എന്തിനാ കരയുന്നതെന്ന് തിയേറ്ററിൽ നിന്ന് പുറത്തിറങ്ങിയപ്പോൾ പലരും എന്നോട് ചോദിച്ചു. സിനിമയെ കുറിച്ച് ഞാൻ ഒന്നും പറഞ്ഞില്ല. ഞാൻ കാരണം സിനിമയ്‌ക്ക് ഒരു ദോഷവും വരരുതെന്ന് വിചാരിച്ചു. എത്ര പേരുടെ അധ്വാനമാണ് ഒരു സിനിമയെന്ന് ഞാൻ നേരിട്ട് കണ്ടതാണ്”.
“എനിക്ക് അന്ന് ഒരുപാട് സങ്കടമായി. ഞാൻ കരയുന്നത് കണ്ടാണ് ആസിഫ് അലി സാർ എന്നോട് നേരിട്ട് വന്ന് സംസാരിച്ചത്. തിയേറ്ററിന് മുന്നിൽ വച്ച് അദ്ദേഹം ചേർത്തുപിടിച്ചപ്പോൾ ഒരുപാട് സന്തോഷം തോന്നി. ആ സീൻ കട്ട് ചെയ്തത് നന്നായിയെന്നാണ് ഇപ്പോൾ തോന്നുന്നത്. എനിക്ക് തന്ന് വാക്ക് അവർ പാലിച്ചു. ആ വീഡിയോ പുറത്തുവന്നതിന് ശേഷം ഒരുപാട് ആളുകൾ എന്നെ വിളിച്ചു”. പറഞ്ഞറിയിക്കാൻ കഴിയാത്തത്ര സന്തോഷം തോന്നുന്നുവെന്നും ആസിഫ് അലി ചേർത്തുപിടിച്ചപ്പോൾ ഒരുപാട് സമാധാനമായെന്നും സുലേഖ പറ‍ഞ്ഞു.
