സൈനിക സ്കൂളിനെ കുറിച്ച് എല്ലാവർക്കുമറിയാം, പക്ഷേ സൈനിക കോളേജിനെ കുറിച്ചോ? പ്രതിരോധ മന്ത്രാലയത്തിന്റെ എ കാറ്റഗറി വിദ്യാഭ്യാസ സ്ഥാപനമായ ഡെറാഡൂണിലെ രാഷ്ട്രീയ മിലിറ്ററി കോളേജിൽ (RIMC) എട്ടാം ക്ലാസ് പ്രവേശനത്തിന് അപേക്ഷിക്കേണ്ട സമയമാണിപ്പോൾ…
പേരിൽ കോളേജുണ്ടെങ്കിലും എട്ടാം ക്ലാസ് മുതൽ പ്ലസ്ടുവരെ പഠനസൗകര്യമുള്ള റസിഡൻഷ്യൽ സ്കൂളാണിത്. സിബിഎസ്ഇ സിലബസ് പ്രകാരമാണ് പഠനം. കായികപരിശീലനം, അച്ചടക്കം, നേതൃശേഷി വികസനം, വിശകലനപാടവം തുടങ്ങിയവയ്ക്കാണ് മുൻതൂക്കം നൽകുന്നത്. അശ്വാഭ്യാസം, പർവതാരോഹണം, ഷൂട്ടിംഗ്, നീന്തൽ, സ്ക്വാഷ്, ഗോൾഫ് തുടങ്ങിയവയിലെല്ലാം പരിശീലനമുണ്ടാകും.
2026 ജനുവരിയിൽ ആരംഭിക്കുന്ന ബാച്ചിലേക്ക് മാർച്ച് 31 വരെ അപേക്ഷിക്കാം. 2026 ജനുവരി ഒന്നിന് പതിനൊന്നരയ്ക്ക് പതിമൂന്നിനുമിടയിൽ പ്രായമുള്ളവർക്ക് അപേക്ഷിക്കാം. ഏഴാം ക്ലാസിൽ പഠിക്കുന്നവർക്കും അംഗീകൃത സ്കൂളിൽ നിന്ന് ഏഴാം ക്ലാസ് ജയിച്ചവർക്കുമാണ് പ്രവേശനം. ആൺകുട്ടികൾക്കും പെൺകുട്ടികൾക്കും അപേക്ഷിക്കാം. ജൂൺ ഒന്നിനാണ് പ്രവേശനപ്പരീക്ഷ. കേരളത്തിൽ തിരുവനന്തപുരത്ത് പരീക്ഷാ കേന്ദ്രമുണ്ട്.
പ്രവേശനപ്പരീക്ഷ, ഇൻ്റർവ്യൂ, വൈദ്യപരിശോധന എന്നിവയ്ക്ക് ശേഷമാണ് രാഷ്ട്രീയ ഇന്ത്യൻ മിലിറ്ററി കോളേജിലെത്തുന്നത്. അഖിലേന്ത്യ തലത്തിലുള്ള പ്രവേശനപ്പരീക്ഷയിൽ ഇംഗ്ലീഷ്, മാത്സ്, പൊതുവിജ്ഞാനം തുടങ്ങിയവയിലെ മികവാണ് വിലയിരുത്തുന്നത്. ആറ് മാസം ഇടവിട്ട് 25 കുട്ടികൾക്ക് വീതം പ്രവേശനം. ഓരോ വർഷവും രണ്ട് ബാച്ച്. പഠനത്തിന് വിവിധ സംസ്ഥാനങ്ങൾ സ്കോളർഷിപ്പും ഏർപ്പെടുത്തിയിട്ടുണ്ട്.
പ്ലസ്ടു തലത്തിൽ സയൻസ് സ്ട്രീം മാത്രമാണുള്ളത്. അതേസമയം, എൻഡിഎ/ നേവൽ അക്കാദമി പ്രവേശനത്തിനായുള്ള യുപിഎസ്സി പരീക്ഷയ്ക്കായി സാമൂഹികശാസ്ത്രത്തിലും പരിശീലനം നൽകും.
