ആറ്റുകാലമ്മയ്ക്ക് പൊങ്കാല അർപ്പിച്ച് നടി പാർവതി ജയറാം. മരുമകൾ താരിണിക്കും സഹോദരിക്കുമൊപ്പമാണ് പാർവതി പൊങ്കാലയിടാൻ എത്തിയത്. ഗായകൻ എംജി രാധാകൃഷ്ണന്റെ വീട്ടിലാണ് പാർവതിയും കുടുംബവും പൊങ്കാലയിട്ടത്. മരുമകളുടെ ആദ്യ പൊങ്കാലയാണെന്നും എല്ലാ വർഷവും അമ്മയ്‌ക്ക് വേണ്ടി പൊങ്കാല അർപ്പിക്കാറുണ്ടെന്നും പാർവതി പറഞ്ഞു.
“കഴിഞ്ഞ വർഷം മക്കളുടെ കല്യാണതിരക്കായതിനാൽ എത്താൻ പറ്റിയില്ല. ഇന്നലെ ക്ഷേത്രത്തിൽ പോയിരുന്നു. മുമ്പത്തേത് പോലെയല്ല, ഇപ്പോൾ ക്ഷേത്രത്തിൽ അടുക്കാൻ പറ്റാത്തത്ര തിരക്കാണ്. താരിണിയുടെ ആദ്യത്തെ പൊങ്കാലയാണ്. പറഞ്ഞ് കേട്ടപ്പോൾ വരണമെന്ന് വലിയ ആഗ്രഹമായിരുന്നു. എല്ലാ വർഷവും പൊങ്കാലയിടാൻ സാധിക്കട്ടെയെന്നാണ് പ്രാർത്ഥന. അമ്മയ്‌ക്ക് പൊങ്കാല അർപ്പിക്കാൻ കഴിഞ്ഞതിൽ വലിയ സന്തോഷമുണ്ടെന്നും” പാർവതി പറഞ്ഞു.
ആദ്യമായാണ് പൊങ്കാല ഇടുന്നതെന്നും ഒരുപാട് സന്തോഷം തോന്നുന്നെന്നും താരിണി പ്രതികരിച്ചു. എല്ലാ വർഷവും പൊങ്കാലയിടും. ഒരുപാട് നാൾക്ക് മുൻപ് തന്നെ ഞാൻ പൊങ്കാലയെ കുറിച്ച് കേട്ടിട്ടുണ്ട്. ഇന്നലെ വന്നപ്പോൾ വലിയ തിരക്കായിരുന്നു. പക്ഷേ അതൊക്കെ ആസ്വദിക്കാൻ സാധിച്ചെന്നും താരിണി പറഞ്ഞു.
