നടിയും സോഷ്യൽമീഡിയ താരവുമായ അഷിക അശോകൻ വിവാഹിതയായി. അകന്ന ബന്ധുവും മലപ്പുറം സ്വദേശിയുമായ പ്രണവാണ് അഷികയുടെ വരൻ. അടുത്ത ബന്ധുക്കളുടെയും സുഹൃത്തുക്കളുടെയും സാന്നിധ്യത്തിൽ ലളിതമായാണ് വിവാഹം നടന്നത്. സോഷ്യൽമീഡിയ താരങ്ങളും വിവാഹത്തിൽ പങ്കെടുത്തിരുന്നു.
ആർക്കിടെക്റ്റാണ് പ്രണവ്. വളരെക്കാലമായി അറിയാവുന്ന ആളാണ് പ്രണവെന്നും പെട്ടെന്നുള്ള കല്യാണമായിരുന്നെന്നും വിവാഹത്തിന് ശേഷം അഷിക ഓൺലൈൻ മാദ്ധ്യമങ്ങളോട് പ്രതികരിച്ചു. ഒരുപാട് പേരെയൊന്നും വിളിക്കാൻ പറ്റിയില്ല. കുറച്ചുപേരൊക്കെ ഷൂട്ടിലായതിനാൽ വരാനും പറ്റിയിട്ടില്ല. പണ്ട് മുതൽ തന്നെ അറിയുന്ന ആളാണ് പ്രണവ്. ഒരുപാട് സന്തോഷമുണ്ടെന്നും അഷിക പറഞ്ഞു.
നിരവധി ഹിറ്റ് ഹ്രസ്വ ചിത്രങ്ങളിൽ അഷിക അഭിനയിച്ചിട്ടുണ്ട്. കൂടാതെ പുന്നഗൈ സൊല്ലും, സെൻട്രിതാഴ് എന്നീ തമിഴ് സിനിമകളിലും അഷിക പ്രധാനവേഷങ്ങൾ ചെയ്തിട്ടുണ്ട്. മലയാളത്തിൽ വിവേകാനന്ദൻ വൈറലാണ് എന്ന സിനിമയിൽ അഭിനയിച്ചു. ഇന്ദ്രജിത്തിന്റെ ധീരം ആണ് അഷികയുടേതായി വരാനിരിക്കുന്നത്.
