ഊട്ടി: സംസ്ഥാനത്തെ സ്വകാര്യ, കേന്ദ്ര, സംസ്ഥാന സർവകലാശാല വൈസ് ചാൻസലർ മാരുടെ യോഗത്തിൽ പങ്കെടുക്കാൻ ഉപരാഷ്ട്രപതി ജഗദീപ് ധൻകർ ഇന്ന് തമിഴ്‌നാട്ടിലെത്തും. തമിഴ് നാട് ഗവർണ്ണർ ആർ എൻ രവിയാണ് സർവ്വകലാശാലാ വൈസ് ചാൻസലർമാരുടെ സമ്മേളനം വിളിച്ചിരിക്കുന്നത്.
ഇതിനായി അദ്ദേഹം ഇന്ന് രാവിലെ ഡൽഹിയിൽ നിന്ന് കോയമ്പത്തൂരിലെത്തും, അവിടെ നിന്ന് രാവിലെ 11.15 ന് വ്യോമസേനയുടെ ഹെലികോപ്റ്ററിൽ ഊട്ടിയിലെ തീട്ടുക്കൽ പ്രദേശത്ത് ഇറങ്ങും. അവിടെ അദ്ദേഹത്തെ ഗവർണർ ആർ.എൻ.രവിയും മുതിർന്ന ഉദ്യോഗസ്ഥരും ചേർന്ന് സ്വീകരിക്കും. വൈസ് ചാൻസലർമാരുടെ സമ്മേളനത്തിൽ പങ്കെടുത്ത ശേഷം വൈസ് പ്രസിഡന്റ് ജഗ്ദീപ് ധൻകർ ഇന്ന് വൈകുന്നേരം 6 മണിക്ക് ഊട്ടിക്കടുത്തുള്ള മുത്തനാട്ടുമണ്ടു പ്രദേശത്തെ തോഡർ സമൂഹവുമായി കൂടിക്കാഴ്ച നടത്തും. ഗവർണർ ആർ.എൻ. രവി ഇന്നലെ വൈകുന്നേരം ആറ് മണിയോടെ ഊട്ടി രാജ്ഭവനിൽ എത്തിയിരുന്നു.
ഇന്ന് നാളെയുമായി രണ്ടു ദിവസത്തെ സമ്മേളനമാണ് ഗവർണ്ണർ വിളിച്ചിരിക്കുന്നത്.
സുപ്രീം കോടതി വിധിയെത്തുടർന്ന് , സർക്കാർ നടത്തുന്ന സർവകലാശാലകളുടെ വൈസ് ചാൻസലർമാരെ നിയമിക്കാൻ മുഖ്യമന്ത്രി എം.കെ. സ്റ്റാലിന് അധികാരം ലഭിച്ചെങ്കിലും 22 സർവകലാശാലകളിൽ 12 എണ്ണം വിസി ഇല്ലാതെയാണ് പ്രവർത്തിക്കുന്നത്. സർവകലാശാലകൾക്കായുള്ള വിസി സെർച്ച് പാനലിൽ യൂണിവേഴ്സിറ്റി ഗ്രാന്റ്സ് കമ്മീഷൻ (യുജിസി) ചെയർമാന്റെ നോമിനിയെ ഉൾപ്പെടുത്തണമെന്ന ഗവർണറുടെ നിർബന്ധം സംസ്ഥാന ഉന്നത വിദ്യാഭ്യാസ വകുപ്പ് നിരസിച്ചിരുന്നു. നിലവിൽ, വിസിയുടെ സഹായമില്ലാതെ ഒരു കൺവീനർ കമ്മിറ്റിയാണ് സർവകലാശാലകളെ നയിക്കുന്നത്. ഈ സർവകലാശാലകളിൽ പലതിലും ഉന്നത വിദ്യാഭ്യാസ സെക്രട്ടറിയാണ് കൺവീനർ. സെക്രട്ടറിയോ അദ്ദേഹത്തിന്റെ പ്രതിനിധിയോ യോഗത്തിൽ പങ്കെടുക്കുമോ എന്ന് വ്യക്തമല്ല.
പുതിയ കോടതി വിധികളുടെയും നിയമത്തിന്റെയും വെളിച്ചത്തിൽ പോലും ഭരണഘടന അദ്ദേഹത്തിന് നൽകിയിട്ടുള്ള അവകാശമനുസരിച്ച് ഗവർണർ ഇപ്പോഴും ചാൻസലറാണ്. സിൻഡിക്കേറ്റിലേക്ക് അംഗങ്ങളെ നാമനിർദ്ദേശം ചെയ്യാനുള്ള അധികാരം അദ്ദേഹത്തിനുണ്ട് എന്നാണ് ഈ രംഗത്തെ വിദഗ്ധർ പറയുന്നത്. ഇതേ സാഹചര്യം പല ദേശീയ മാധ്യമങ്ങളും റിപ്പോർട്ട് ചെയ്തിട്ടുണ്ട്.
