പിതാവിന്റെ പാത പിന്തുടർന്ന് മകനും പോർച്ചുഗൽ ജഴ്സിയിൽ അരങ്ങേറി. ക്രിസ്റ്റ്യാനോ റൊണാൾഡോയുടെ മകൻ റെണാൾഡോ ജൂനിയറാണ് രാജ്യത്തിനായി അരങ്ങേറിയത്. അണ്ടർ 15 ദേശീയ ടീമിൽ പിതാവിന്റെ അതേ ജഴ്സി നമ്പരായ 7 ആണ് ജൂനിയറും ധരിച്ചത്. ചുവപ്പും പച്ചയും നിറങ്ങളിലുള്ള ജഴ്സിയിലാണ് പോർച്ചുഗൽ താരങ്ങൾ ഇറങ്ങിയത്.
ജപ്പാനെതിരെ 4-1 നാണ് പറങ്കിപ്പട വിജയിച്ചത്. ക്രൊയേഷ്യയിൽ നടന്ന വ്ലാറ്റ്കോ മാർക്കോവിച്ച് അന്താരാഷ്‌ട്ര ടൂർണമെൻ്റിലാണ് ജപ്പാനുമായി ഏറ്റുമുട്ടിയത്. ആദ്യ പകുതിയിൽ ബെച്ചിലിരുന്ന താരം രണ്ടാം പകുതിയിലാണ് കളത്തിലെത്തിയത്. 26 മിനിട്ട് കളത്തിലുണ്ടായിരുന്ന താരം ലെഫ്റ്റ് വിംഗറായാണ് കളിച്ചത്. റെണാൾഡോ സീനിയറും കരിയറിന്റെ ആദ്യ കാലങ്ങളിൽ ലെഫ്റ്റ് വിംഗറായിരുന്നു.
റെണാൾഡോ ജൂനിയർക്ക് വലകുലുക്കാനായില്ലെങ്കിലും പ്രകടനം പോർച്ചുഗലിന്റെ വിജയത്തിന് കരുത്ത് പകർന്നു. റാഫേൽ കാബ്രാൾ ഹാട്രിക് തികച്ചപ്പോൾ ഹെന്റിഖ് അമെൻ ശേഷിച്ച ഗോൾ നേടി. മകന്റെ അരങ്ങേറ്റത്തിൽ ക്രിസ്യാറ്റാനോ സന്തോഷം പ്രകടിപ്പിച്ച് ചിത്രങ്ങൾ പങ്കുവച്ചു. അഭിമാനമെന്നും അദ്ദേഹം കുറിച്ചു.
Leave a Comment