അഭിനയ ജീവിതത്തിൽ തന്നെ ഏറെ വേദനിപ്പിച്ച നിമിഷങ്ങൾ ഓർത്തെടുത്ത് ബോളിവുഡ് നടി പ്രീതി സിന്റ. ‘കൽ ഹോ നാ ഹോ’ എന്ന ചിത്രത്തിൽ അഭിനയിക്കുന്ന സമയത്താണ് തന്റെ ആദ്യ കാമുകൻ മരിക്കുന്നതെന്നും ആ സിനിമ കാണുമ്പോഴെല്ലാം ഇപ്പോഴും താൻ കരയാറുണ്ടെന്നും പ്രീതി സിന്റ പറഞ്ഞു. ആരാധകരുമായുള്ള ചോദ്യോത്തര വേളയിലാണ് താരത്തിന്റെ വാക്കുകൾ.
‘കൽ ഹോ നാ ഹോ’ സിനിമ കാണുമ്പോഴെല്ലാം ഞാൻ കരയാറുണ്ട്. എന്റെ ആദ്യ കാമുകൻ കാറപകടത്തിൽ മരിക്കുന്ന സമയത്താണ് ആ സിനിമ ചെയ്തത്. അതുകൊണ്ട് ഈ ചിത്രം എന്നെ മാനസികമായി ഒരുപാട് സ്പർശിച്ചിട്ടുണ്ട്. മറ്റൊരു കാര്യം എന്തെന്നാൽ സിനിമയുടെ പല സീനുകളും ചിത്രീകരിക്കുമ്പോഴും എല്ലാ കഥാപാത്രങ്ങളും സ്വാഭാവികമായി കരഞ്ഞു. അമൻ എന്ന കഥാപാത്രത്തിന്റെ മരണരംഗം ചിത്രീകരിക്കുമ്പോൾ ഞാൻ ഉൾപ്പെടെ കാമറയ്‌ക്ക് പിന്നിലുള്ള എല്ലാവരും കരഞ്ഞുവെന്നും പ്രീതി സിന്റ പറഞ്ഞു.
നിങ്ങളുടെ ‘കൽ ഹോ നാ ഹോ’ സിനിമ കാണുമ്പോഴെല്ലാം താൻ കരയാറുണ്ടെന്നാണ് ആരാധകൻ പറഞ്ഞത്. ഇതിന് മറുപടി നൽകുന്നതിനിടെയായിരുന്നു താരത്തിന്റെ പ്രതികരണം. ഷാരൂഖ് ഖാൻ പ്രധാന വേഷത്തിലെത്തി 2003-ൽ പുറത്തിറങ്ങിയ ചിത്രമാണ് ‘കൽ ഹോ നാ ഹോ’. നൈന കാതറിൻ കപൂർ എന്ന കഥാപാത്രത്തെയാണ് പ്രീതി സിന്റ ചിത്രത്തിൽ അവതരിപ്പിച്ചത്. ഏറെ പ്രേക്ഷകശ്രദ്ധ നേടിയ ചിത്രം കൂടിയാണിത്.
