തിരുവനന്തപുരം : സ്കൂള് സമയമാറ്റം സംബന്ധിച്ച കാര്യങ്ങളില് വിട്ടുവീഴ്ചയില്ലെന്ന് വിദ്യാഭ്യാസ മന്ത്രി വി ശിവന്കുട്ടി. സമസ്തയും സമസ്തയെ പിന്തുണച്ച് മുസ്ലീം ലീഗും രംഗത്തെത്തുകയും സമസ്ത സ്കൂള് സമയമാറ്റത്തില് സമര പരിപാടിക്ക് ഒരുങ്ങുമ്പോഴുമാണ് നിലപാട് കടുപ്പിച്ച് കൊണ്ടുള്ള ശിവന്കുട്ടിയുടെ പ്രസ്താവന. കുട്ടികളുടെ വിദ്യാഭ്യാസമാണ് സര്ക്കാരിന് പ്രധാനമെന്നും ഏതെങ്കിലും വിഭാഗത്തിനു മാത്രമായി സൗജന്യം കൊടുക്കാന് സാധിക്കില്ലെന്നും ശിവന് കുട്ടി പറഞ്ഞു.
“സമയം അവര് ക്രമീകരിക്കുന്നതായിരിക്കും നല്ലത്. അല്ലാതെ ഒരു പ്രത്യേക സമൂഹത്തിന്റെ പേര് പറഞ്ഞ് സര്ക്കാരിനെ വിരട്ടുന്നത് ശരിയായ നടപടി അല്ല” സിപിഎം നേതാവും മന്ത്രിയുമായ വി ശിവന്കുട്ടി പറഞ്ഞു.
മദ്രസ പഠനത്തിന് തടസമുണ്ടാകുന്ന വിധത്തില് സ്കൂള് പഠന സമയം മാറ്റി എന്നാരോപിച്ച് സര്ക്കാരിനെതിരെ സുന്നി സംഘടനയായ സമസ്തയും അവരെ പിന്തുണച്ച് ലീഗും രംഗത്തെത്തിയതിനു പിന്നാലെയാണ് മന്ത്രി വി ശിവന്കുട്ടിയുടെ പ്രതികരണം.സെക്രട്ടേറിയറ്റ് ധര്ണ അടക്കം രണ്ടു മാസം നീണ്ടു നില്ക്കുന്ന സമരങ്ങളാണ് സമസ്ത കേരള മദ്രസ മാനേജ്മെന്റ് അസോസിയേഷന് (എസ്കെഎംഎംഎ) സംസ്ഥാന സമരപ്രഖ്യാപന കണ്വന്ഷനില് പ്രഖ്യാപിച്ചത്. മദ്രസ പഠനത്തില് വിട്ടുവീഴ്ച ചെയ്യാനാവില്ലെന്നു സമസ്ത കേരള ഇസ്ലാം മത വിദ്യാഭ്യാസ ബോര്ഡ് ജനറല് സെക്രട്ടറി എം.ടി.അബ്ദുല്ല മുസല്യാര് പറഞ്ഞു.
മദ്രസാപഠനത്തെ ബാധിക്കാതെ തന്നെ സ്കൂള് സമയം നീട്ടാന് സാധിക്കുമെന്നും, അതിനായി സര്ക്കാര് സമസ്തയുമായി ചര്ച്ച നടത്തണമെന്നും സംഘടന ആവശ്യപ്പെട്ടു. സമസ്തയ്ക്കൊപ്പം ചേര്ന്ന പ്രത്യക്ഷ സമരത്തിനില്ലെന്നാണ് മുസ്ലിം ലീഗ് പറയുന്നത്.
