പത്തനംതിട്ട: 66 വയസ്സുള്ള വൃദ്ധനെ മകനും മരുമകളും ക്രൂരമായി മർദ്ദിച്ചു. ദൃശ്യങ്ങൾ പുറത്തായതിനെ തുടർന്ന് പൊലീസ് കേസെടുത്തു. പ്രതികളെ അറസ്റ്റ് ചെയ്തു.
പത്തനംതിട്ട ജില്ലയിലെ അടൂരിലാണ് ഈ ക്രൂരമായ സംഭവം അരങ്ങേറിയത്. 66 കാരനായ തങ്കപ്പനാണ് മർദനമേറ്റത്. സംഭവത്തിൽ മകനും മരുമകൾക്കുമെതിരെ അടൂർ പൊലീസ് കേസെടുത്തു. മകൻ സിജു പൈപ്പ് കൊണ്ടും മരുമകൾ സൗമ്യ കമ്പുകൊണ്ടും തല്ലുന്നതാണ് ദൃശ്യങ്ങളിൽ വ്യക്തമാകുന്നത്. ഇത് വിവിധ സാമൂഹിക മാധ്യമങ്ങളിൽ പ്രചരിച്ചിരുന്നു. തുടർന്ന് പൊലീസ് സ്വമേധയാ കേസെടുക്കുകയായിരുന്നു.
കഴിഞ്ഞ ഞായറാഴ്ച ഉച്ചയ്‌ക്ക് രണ്ടുമണിയോടെയായിരുന്നു സംഭവം. മകനും മരുമകളും ചേർന്നാണ് മർദിച്ചത്. എന്നാൽ, കേസൊന്നും വേണ്ട തനിക്ക് പരാതിയില്ലെന്നുമാണ് തങ്കപ്പൻ പറയുന്നത്. ചോദ്യം ചെയ്യലിനായി മകനെയും മരുമകളെയും പൊലീസ് കസ്റ്റഡിയിലെടുത്തിട്ടുണ്ട്.പിതാവ് വീട്ടിൽ വരുന്നത് ഇഷ്ടമില്ലാത്തതിനാൽ ഇരുവരും ചേർന്ന് മർദിച്ചെന്നാണ് എഫ്ഐആറിൽ പറയുന്നത്.
