മറുനാട്ടിൽ പൂക്കാൻ വിധിക്കപ്പെട്ട ജന്മമാണ് മലയാളിയുടെതെന്നും മറുനാടൻ മലയാളി വായന കൂട്ടങ്ങൾ നടത്തുന്ന ലോക മലയാളഭാഷാ ദിനാചരണം അഭിമാനകരമാണെന്നും കേരള സാഹിത്യ അക്കാദമി മുൻ സെക്രട്ടറി പായിപ്ര രാധാകൃഷ്ണൻ. ന്യൂസിലൻഡിലെ ന്യൂപ്ലിമൗത്തിലെ മലയാളി വായനക്കൂട്ടം സംഘടിപ്പിച്ച കേരളപ്പിറവി ദിനാഘോഷം ഓൺലൈനായി ഉദ്ഘാടനം ചെയ്യുകയായിരുന്നു പായിപ്ര.
മലയാളത്തിലെ പ്രശസ്ത സാഹിത്യകാരന്മാരുടെ കത്തുകളടങ്ങിയ പായിപ്ര രാധാകൃഷ്ണന്റെ കത്തുകളുടെ പുസ്തകത്തിന്റെ ചർച്ചയും പ്രദർശനവും മലയാളം ലൈബ്രറിയിൽ നടന്നു. വായനക്കൂട്ടത്തിന്റെ സംഘാടകൻ കൂടിയായ ജോബിൻ ജോർജ് അധ്യക്ഷത വഹിച്ച ചടങ്ങിൽ പാലക്കാട് സ്വദേശിനിയും പ്രധാന അധ്യാപികയുമായ കുസുമം ജോസഫ് പുസ്തക ചർച്ചയ്ക്ക് തുടക്കം കുറിച്ചു.
മലയാളി അസോസിയേഷൻ ജോയിൻ സെക്രട്ടറിപ്രബിൻ യേശുദാസ് മുഖ്യാതിഥിയായിരുന്നു. സമാജം എക്സിക്യൂട്ടീവ് അംഗം ജോഷ്നി ആന്റു മുഖ്യപ്രസംഗം നിർവഹിച്ചു. ജിജോ കുഞ്ചാക്കോ കേരളപ്പിറവി ദിന സന്ദേശം നൽകി. റീമാ തോമസ്, രാജീവ് പുരക്കൽ എന്നിവർ ആശംസകൾ അറിയിച്ചു. ചടങ്ങിൽ വായനക്കൂട്ടം പ്രസംഗമത്സരത്തിൽ ഒന്നാം സ്ഥാനം നേടിയ ഡിയോൺ രാജീവിന് മെമെന്റോ സമ്മാനിച്ചു. വായനക്കൂട്ടം ഭാരവാഹി രേഖ ദിനു നന്ദി പ്രകാശിപ്പിച്ചു.
